هاتريك

التّااااج التّااااج التّاااااج أوصفلك يا حبيبى التاااااج

جالى ثلاثة تيجان و الحمد للرحمان .. تاج من ذو النون و تاج من تسنيم وتاج من دينا لكن التلات تيجان هما نفس التاج يعنى هاتريك و الحمد لله .. موضوع التيجان ده حاجه غريبه جدا لأنه غتت لكن لذيذ .. رخم بس التدوين من غيره يبقى أرخم .. من الأخر التاج سلسله من الألام المتتاليه لكن من غير تاج يبقى نبطل تدوين أحسن .. مين .. بتقولوا أيه مش سامع .. قلت الجمله دى قبل كده .. صحيح .. خلاص التاج الجاى نغيرها إن شاء الله

ليتس جووووووووو

ايه اللي هيحصل لإيميلك لما تموت ؟
أعوذ بالله .. أيه الفااال ده عالصبح .. الموت علينا حق لكن مش فى وشى كده ده أنا لسه ما دخلتش دنيا لكن عموما هعمل الأتى عشان أحبابى يعرفوا يدخلوا على الأيميل بتاعى أول حاجه هاجيب حاجه عامله زى صندوق الأسرار بتاع دافنشى و أحط فيه ورقه مكتوب فيها جمله هاقولها كمان شويه و هخلى الصندوق ده مع أكثر أحبابى حفظا لأسرارى بحيث أنى لو أتكلت هيسلم الصندوق ده لمن يهمه أن يدخل على الأيميل بتاعى فى حال موتى .. طيب ويفتح الصندوق أزاى .. يعنى كلمة السر بتاعة الصندوق أيه .. أمممممممم .. كلمة السر بتاعة الصندوق هخيلها مع واحد تانى من أحبابى .. يعنى من الأخر اللى هيقدر يجيب الصندوق و يقدر يعتر على صديقى التانى هيقدر يفتح الصندوق و يلاقى فيه ورقه مكتوب فيها أستعين بأحد الهاكرز المعتقين فى مجال التشفير و خليه يفتح لك الأيميل

اديت الباس وورد لحد قبل كده ؟
هههههههههههه لا والله لأ ناقص تقولى عطيت صندوق الأسرار لمين و الباسوورد لمين .. ألعبوا غيرها

لو أه كانت طبيعة علاقتك بيه ايه ؟
هههههههههههه 2 يعنى أنا مش عارف أيه الألحاح ده .. طب وبعدين .. قلتلكم الموضوع كله منوط بصندوق الأسرار

اسمك ؟
أحمد

اسم الدلع المشهور وسط اصحابك ؟
واحد أسمه أحمد هيبقى أسم الدلع بتاعه أيه حبلص مثلا .. أكيييد حماده و ميدو لكن فيه أسماء أخرى زى مثلا أحمد برمجه و أبو حميد

عمرك ؟
9294 يوم يعنى تقريبا 25 سنه و خمس شهور

برجك ؟
العذرااااااااء لكن على الرغم من أن مواصفات أصحاب البرج ده منطبقه تقريبا عليا و على الرغم من أحترامى الشديد لأى حد مؤمن بهجص الأبراج إلا أنى لا أؤمن تماما بتاتا بحاجه أسمها أبراج على الأطلااااااااااااااااااااااااااااااااااااااق.

مجال دراستك ؟
الهندسة

شخصيتك نوعها إيه ؟
غتت و غلس و رخم و دماااااااااغ و ملول ... أمممممممممم .. و عندى القدره على زرع الحب فى اللى حواليا .. مش هينفع الكلام ده لازم أفصل أكتر .. أحمد شخصيه حبوبه لكن غتتوته يحب الفرح و النكد والنكد والفرح .. اللى يشوفه من بعيد من على السطح ما يحسش بيه و اللى يقرب من بجد ما ينسهوش و لو ما شفوش سنين .. ساعات اللى قدامه يحس أنه بيحبه و ساعات يحس أنه عايز يرميه من ناطحة سحاب .. أحمد نفسه يعيش مع اللى حواليه فى أنس و حب لكن لما بيقلب بيكرهوه لكن لمده صوغيره قيمة ما يرجع يصالحهم .. دمه خفيف و تقيل فى نفس الوقت لما يحب حاجه يخلص لها أوى و فى كوكب الطناش ملك متوج .. برىء و طيب و بجد من غير كدب صعب تلاقيه فى الزمن ده لأنه أحمد عمره ما بيأذى حد على الأطلاق .. من النوع اللى الواحد يأمن معاه على نفسه و ماله واللى يمدح فى نفسه شيطان من الأخر أعزب و أرتدى بنطلون جبردين

السفر بالنسبه لك ؟
أكرهه لما يكون إجبارى و أموت فيه لو بمزاجى

المود بتاعك ؟
زى منحنى الساين بالضبط

وقت فراغك بتعمل فيه ايه ؟
بستريح من البرمجه بالأبحار فى عالم النت و التدوين

الاكلة المفضلة ؟
كتير لكن الملكه المتوجه على عرش معدتى هى البسله

الصفات اللي خدتها من بابا ؟
القراءه و الحفاظ على الكتب و أنى أتخنق بسرعه

الصفات اللي خدتها من ماما ؟
الطيبه و الحساسيه

اكتر 6 حاجات بتكرهها ؟
أن حد يهجص و يهلس عليا
السجاير
الضوضاء
أنى أدخل مصلحه حكوميه
وجع الدماغ بأنواعه
أنى أقوم من النوم قبل ميعادى

اكتر 6 حاجات بتحبها ؟
أهلى و اللى بحبهم
البرمجه
الأنترنت
كوباية شاى بالنعاع "أما أطلع أشرب شاى لأنى أفتكرت"
الرقه
أن يجيلى أيميل جديد
الظلام .. بس مش أى ظلام ظلام معين لما أكون تعبان وقرفان أو فيه مشكله حصلت ويكون فيه ضوء خاااافت من بعيد فى نفس الوقت .. الظلام اللى من النوع ده بيخفف عنى جدا و بيساعدنى جدا على تجاوزالأزمه

الشغل بالنسبه لك ؟
حياتى و حبى و عشقى

ايه الكمبيوتر والانترنت بالنسبة لك ؟
يعنى قاعد أقول أكتر حاجه بحبها البرمجه و الأنترنت .. أنا مش هجاوب

يالا نبدا بقى حملة الأذيه

أنا همرر التاج ده ل
ساره الطوبجى و بيسوو و جوسى و كريم و فاطمه و ميموو

حديد فى حديد .. يفعل الله ما يريد

تاج محترم مررته لى بيسوو ولأن التاج سلسلة من الألام المتتالية لكن من غير تاج يبقى نبطل تدوين أحسن فأنا يسعدنى أنى أرد على تاج بيسوو ذات الحكايات الرقيقة جدا و المقالب القوية جدا

عايزة تعرفي خمس حاجات عني ماحدش يعرفها .. طويب .. بعد البحث و التنقيب فى السجلات الأزلية "ما لم يُصيبها زهايمر" أكتشفت أن لازم و لو واحد على الأقل يكون عارف .. لكن بعد بحث قوى و بخوارزم خبيث لقيت خمس حاجات

والمفروض أنى أمرر التاج ده لخمس أشخاص

ليتس ستارت

واحد
وأنا فى خمسة إبتدائى ضاع منى تلاته جنيه وكنت هموت بسبب الموضوع ده .. مش عشان المبلغ الخرافى اللى ضاع و لكن عشان سببين الأول أنهم أتسرقوا مش ضاعوا أو بمعنى أصح أتناشلت من حرامى مبتدىء بيجرب يسرق الأطفال الأول قبل ما يقتحم عالم الكبار.. و السبب التانى الأهم أنى كنت هجيب بالتلاته جنيه 9 أعداد من الشياطين ال13 "كان العدد ب 30 قرش"

أتنين
وأنا فى أولى ثانوى سرقت
سرقت كتاب فيه ملخص كل روايات شكسبير من مكتبة المدرسة لأنه كان تحفة بجد و تفننت فى أن المشرفة ما تشوفنيش و إلأ كانت هتعمل محكمة تفتيش فى المكتبة و وهاخد حكم بالحرق حتى الموت كالساحرااااااااااااااات لكن ربنا ستر و قدرت أفلت من مسز هولمز بس بصراحة رجعته بعد شهرررررريـــــــن عشان ضميرى نقح علي .. وطبعا لأن من السهل أن الواحد يدخل المكتبة بكتاب فكان ترجيع الكتاب سهل والحمد لله بدون محاكم تفتيش

تلاته
فيه إمتحان ميد تيرم ما دخلتوش و أنا فى تالتة كلية لأنى ما كنتش مذاكر حاجة على الأطلاق تماما فى المادة الفقر دى .. أحساسى لما ما دخلتش الأمتحان لا يوصف و جالى إكتئاب بسبب الموضوع ده بس ربنا ستر و الدكتور عمل إمتحان تانى فى أخر السنة لمن يريد الأعادة و دى حاجة نادراً جدا لما تحصل

أربعة
بسبب إمتحانات التيرم فى الكلية و أنا فى تالتة برضوه أخدت قرار غريب أنى ما أكلمش أى حد على وجه الأرض خااااااااالص و فضلت الحالة دى كمان أسبوعين بعد الأمتحانات يعنى شهر بالتمام و الكمال و كل اللى حواليا كانوا هيموتوا و يعروفوا أنا ساكت ليه لدرجة رهيـــــــــــــــــــــبه .. على فكرة هو أحساس ذرى و بيخلى الواحد يركز جداااااااااااااااااااا كما لو كان كاهن من كهنة التبت المخضرمين فى فن التركيز لكن للأسف شهرين فى الحالة دى و يا إما الواحد يتجنن أو اللى حواليه هما اللى يتجننوا

خمسة
من 3 سنين و 4 شهور عملت برنامج فى 5 شهور كاملة و فشل فشل ذريع أو بمعنى أصح فشل على مستوى المستخدمين يعنى من الأخر أنا بس اللى أعرف أستخدمه لأنى بلف حوالين عيوبه و عيوبه صعب جدا جدا جدا جدا تتصلح و النتيجة توتال فيلير وصلنى لأقوى حالة إكتئاب مريت بيها لكن أقولكم على سر .. أحسن أنه فشل لأنه فشله كان هو الخير المحض والله .. ولو كان نجح الله أعلم كان أيه اللى هيحصل بس غالبا كنت هاتحرم من حاجات كتير أووى

نيجى بقى للأشخاص اللى هابعت التاج ليهم

الغالى ذو النون المصرى
تسنيم الملاك الطائر
روزاليا ملكة الأحساس
صديقى العزيز كريم
و اللى مدونتى لا تكتمل إلا بها فاطمة . أف تى ام