شنطة سفر

لو هتسافر(ى) تعيش(ى) فى جزيرة لوحدك
هتاخد(ى) معاك(ى) أيه من شنطة الحياة؟؟

العرب و العظايا

"اللى مش هيتطور هيحصله أيه .. هينقرض و مش بس كده كمان .. ده كمان هيتعرض فى متحف" .. هى دى فكرة قصة أسطورة أرض العظايا للمبدع د.أحمد خالد توفيق .. من أجمل السلاسل اللى الواحد قرأها هى سلسلة ما وراء الطبيعة بتاعة د.أحمد خالد توفيق بثقافته اللامتناهية و أسلوبه المحبوب اللى هو أقرب لصوت عقل بيفكر منه لمجرد حكاية أو أسطورة ومن أجمل ما كتب أسطورة أرض العظايا .. الأسطورة دى أتكلم عنها قبل ما يكتبها بسنين طويلة , أعتقد أنه لما قال أن فى أسطورة قادمة أسمها أرض العظايا كنت أنا فى أولى ثانوى و لما كتبها كنت فى رابع سنة فى الكلية .. كل اللى قالوه فى وقتها أن العظايا تعنى الديناصورات المنقرضة .. لما قرأت القصة و لغاية صفحة 80 كنت فاكر أن أبطال القصة سالم و سلمى هيقابلوا ديناصورات أو ما شابه فى أرض أسمها أرض العظايا و خصوصا أن القصة كلها جو خيال علمى عن كوكب غامض اللى حظ سالم و سلمى هيوقعهم فيه لكن خدت الصدمة صح لما أكتشفت أن العظايا هما أحنا العرب!!

ويكتشف سالم و سلمى الحقيقة المريعة على الكوكب الغريب ده أن

ويبدأ المعنى اللى فى القصة يطلع بالراحة لما يعرف سالم و سلمى من اللى بقوا من العرب ليه ده كله حصل
"أن زمان كان فيه عالمين .. عالم الشرق و الغرب و كان التناقض بين العالمين رهيــــــــــب على الرغم من محاولات التقريب بينهم" و طبعا ثروات العرب و الشرق عموما كانت بلا حدود

أما الغرب فكانوا

وكانوا

أما أحنا فكنا

لغاية ما

وكانت النتيجة

وتطورت الأحداث لغاية ما جمع الغرب كل أثار الشرق حتى البشر أنفسهم و حطوهم فى المتاحف لكن طبعا بتتطلع جبهة مقاومة من الناجيين من العرب اللى لا يمكن يمثلوا أى خطر على الغرب لكن

القصة عجبتنى أوى وخصوصا التشبيه بين حالنا و حال الديناصورات .. الديناصورات كانت قوية جدا لكن أنقرضت .. والعلماء مختلفين فى أسباب أنقراضها لكن أشهر حاجة قريتها هى حلول العصر الجليدى و أن الديناصورات ماقدرتش تعيش و تصارع من أجل البقاء فى العصر ده .. نرجع لينا أحنا بقى .. باقى لينا قد أيه و ننقرض لأن كل ثانية بتعدى هما "الغرب" بيطورو نفسهم و حياتهم و أحنا بنتأخر أكتر و أكتر لغاية مافى يوم ممكن نصحى الصبح نلاقى نفسنا عظايا

كفاية كده أشفوكوا التدوينة القادمة إن شاء الله اللى هتكون عن أزاى مطور البرامج يلاقى فكرة برنامج يعملها

بى أس
كل الصور اللى فى التدوينة دى مسحوبة سكانر من رواية أسطورة أرض العظايا من سلسلة ماوراء الطبيعة ل د.أحمد خالد توفيق

محمد صبحى عايش فى غيبوبة

النهاردة فوجئت أن فيه مسلسل جديد لمحمد صبحى أسمه عايش فى غيبوبة بيتعرض على القناة الأولى .. أى مسلسل لمحمد صبحى لازم أتفرج عليه بدون نقاش , محمد صبحى محترم و بيحترم عقلية المُشاهد فى زمان نُدر فيه أحترام الأعلام لعقلية المُشاهد .. بصراحة هى دى أهم حاجة عندى أن أتعامل مع أعلام يحترم عقلى عموما .. المسلسل جميل أوى ومن أول ما شفته حسيت انه أسقاط على كل شخصيات المجتمع .. ما بين أخوه بتاع الأندلس اللى بيبكى على أمجاد الماضى و أخوه دبور اللى طالع واكل نازل واكل و أخوه عاكف اللى عاكف على نفسه فقط و أمه رعايا و أبوه اللى أتضرب فى الأنتخابات ومعرفش يدى صوته .. يارب بقى المسلسل يقدم حلول بشكل أو بأخر للمشاكل اللى بيعرضها .. كفاية بقى .. أحنا شبعنا تحليل و تذكير بمشاكلنا و دى مشكلة ملحوظة جدا جدا فى أعلامنا العربى .. تحليل و عرض و تذكير بالمشاكل بدون تقديم حلول .. شبعنا بقى .. 30 سنة و احنا على الحال ده و ختمت بعمارة يعقوبيان .. عمارة يعقوبيان أختلف الكثير على جدوى فضح مصر بالطريقة دى و خصوصا قُدام العالم الغربى بس أنا رأيى الخاص أن المشكلة الأكبر عدم طرح حلول فى الفيلم لكل المشاكل اللى بيناقشها .. كلها مشاكل معروفة و مفيهاش جديد .. كلها أتناقشت قبل كده .. يمكن أتناقشت بأسلوب مختلف شوية فى يعقوبيان بس فى الأول و فى الأخر أحنا بناقش مشاكلنا من سنوات طوال أوى بدون تقديم حلول ليها من الأخر اللى يعرض مشكلة يحاول يقدم حلول الا لو كانت مشكلة محتاجة تحليل أكتر و تناول فكرى عميق .

كفاية كده

ذكاء نادر

قابلت النهاردة واحد من أصدقائى .. هو نوع مختلف تماماً .. صديقى ده ربنا أعطاه ذكاء نادر وقدرة عجيبة على التحليل لكن يا سبحان الله لم ينجح فى الأستفادة منه بالطريقة المُثلى .. على العكس تماماً .. اللى مايعرفوش كويس و مقربش منه يفتكره خنوع أو فاشل على أقل تقدير .. هو من النوع اللى بيعذب نفسه دائماً بأفكاره أو زى ما بتقول إميلى برونتى فى مرتفعات ويذرينج "الأفكار هى أشبه بطاغية تعود لتعذبنا بأستمرار" بس هى العملية زايدة عنده شوية .. هو بيعذب نفسه 24 ساعة بأفكاره و أخطأءه و بدل ما ده يدفعه للأمام و يحاول يحل مشاكله بيرجع ورا أكتر و أكتر ويفضل يسقط فى بئر أفكاره و بئر أفكاره أملس الجوانب كل ما يحاول يطلع ينزل تانى تحت على الرغم من ذكاءه النادر , تلاقى واحد عادى ربنا لم يهبه الذكاء اللى عند صديقى ده لكن ناجح نجاح رهيييييييب , حد فاكر فيلم فورست جامب , فورست كان غبى بالمعنى الخام لكلمة الغباء لكن نجح نجاح باهر فى كل حاجة عملها لأنه
1. مفيش حاجة عنده أسمها تردد
2. كان بينفذ المطلوب منه بالضبط من غير تفكير , يعنى لما سأل واحد أزاى يلعب البينج بونج قاله فقط خلى عينك على الكورة وهو ده اللى هو عمله .. كل تركيزه على حاجة واحدة أنه عينه تكون على الكورة ونجح و بقى لاعب متميز لأعلى درجة.
3. كان عنده ارادة قوية للغاية
4. كان المادة الخام للطيبة
5. كان العمل عنده أكتر من الكلام
6. كان دائماً بينظر للحياة بمنظار وردى

التطوير هو الحياة

التطوير هو الحياة .. اجمل كلمة ممكن الواحد يسمعها و ينفذها .. تطوير .. بحس أنى باخد نفس عميــــــــــــــــق لأن التطوير شىء مالوش حدود ده غير أن بيحمل الأمل فى حياة افضل .. بصوا لكلمة تطوير تلاقيها مضاد حيوى لكل المشاكل اللى حوالينا .. مياه راكدة و فساد و طغيان لأن التطوير بيدخل فى كل حاجة فى الحياة مهما كانت تافهة .. تعالوا ندخل لعالم البرمجة المثير .. من الصعب أن المبرمج يلاقى فكرة جديدة و حلوة و مطلوبة و ما أتعملتش قبل كده لكن لو شلنا من دماغنا كلمة فكرة جديدة دى و حطينا بدلها كلمة تطوير (وليس تقليد) البرامج الموجودة هنلاقى الالاف الأفكار اللى تصلح للتطوير و مع مرور الوقت ممكن الواحد يوصل للفكرة اللى محدش عملها قبله يعنى يوصل لمرحلة الأبداع الكامل الحقيقى .. ننزل تانى من سماء البرمجة الواسع الجميل و نرجع لكلمة التطوير بمفهومها الواسع الكبير , زمان كنت أقرأ الأية الكريمة

( ظهر الفساد فى البر والبحر بما كسبت أيدي الناس ليذيقهم بعض الذي عملوا لعلهم يرجعون ) ( الروم : 41 )

وكنت باضيق من أحساسى بالفساد المسيطر فى كل مكان لكن دلوقتى باحس بالأية بشعور مختلف تماماً , الأية الكريمة دعوة عامة شاملة للأصلاح و التطوير لأن القضاء على الفساد بيكون عن طريق الأصلاح و التطوير والله ورسوله اعلم.

الأصلاح فى الأرض من غايات الخلق عشان كده هو موضوع كبير و عشان حاجة تانى كمان و هى أن صعوبة الموضوع بتكمن فى الأساس فى الفساد اللى مش بيتوقف عن محاربة الأصلاح بكل الطرق.

جميل جدا يالا بقى نصلح و نطور. ههههههههه .أبقى قابلنى ميين اللى هيسيبك تصلح عشان أساسا تتطور.

اطار أسمه عدم احترام ادامية الأنسان

زمان كنت بتشل عشان القطر ييجى , كان فى دكتور عندنا فى الكلية كان بيقول أنه لما كان بره فى الخارج مواعيد القطار هناك بالثانية يعنى كده 10.35.44هههههههه , أنا بقى فضلت مستنى من 1.35 صباحاُ حتى 3.15 صباحاً برضوه , يعنى بمقاييس الدول الأوربية كان ممكن يحصل تغيير وزارى فى التأخير ده. هو صحيح الموضوع مش بيحصل كل يوم , ممكن مرتين فى الشهر و ساعات مره كل أسبوع بس ده برضوه فى اطار أسمه عدم احترام ادامية الأنسان. بعيداً عن القطارات , قرأت مره من سنتين فى الاهرام خبر صغير فى ركن مهمل بس عايز كتب تفسره الخبر بيقول ان كان فيه راجل مهم جدا فى المانيا , قاعد فى مطعم و طلب كافيار لكن الجرسون اتأخر و جاب الكافيار بعد مدة شوية فالراجل المهم ده شتمه شوية شتائم متنقية "بالألمانى طبعاً مش بالمصرى" فكانت النتيجة طبعا -- بعد ما الجرسون اشتكى -- أن الراجل ده اتفصل من شغله (الراجل المهم مش الجرسون) و كمان حط المستشار الالمانى فى حرج بااااااااااااااااااالغ .. ده بقى اطار تانى اسمه احترام ادامية الأنسان. تعالوا نكمل مسيرة العقد الغربية , اى كتاب بيتكلم عن قصص فى الغربة عن الديار بيبقى حبيبى , كان فيه كتاب صغير بتحكى فيه طالبة كانت بتدرس فى الخارج اسمها كريمة كامل تقريباً أن بلد زى امريكا نجحت تماما فى ما يسمى بالمدنية و احترامها و كانت بتضرب أمثلة و بتقول لا يمكن حد يصدقها هنا فى مصر .. يعنى مثلا لو واحد نازل من على سلم و أتزحلق ممكن يرفع قضية على المهندس اللى عمل السلم , ولو واحد أكل فى مطعم و جاله بس مغص .. فقط مغص مش تسمم , يبقى المطعم راح فى ستين داهية وربنا يستر و ما يكونش فيه تعويض , بس بصراحة يا جماعة هى برضوه كانت بتتكلم على أن معدل الجريمة هناك يفوق الوصف, أنا معاكو ان معدل الجريمة فى مصر مرعب بس لعب عيال بالنسبة لمعدل الجريمة فى بلد زى أمريكا لكن بعيداً عن ده كله وعن امريكا و أوروبا , الفكرة كلها بتكمن فى احترام المواطن و انه يحس فى أى تعامل مع أجهزة الدولة انه محترم كما لو كان ملك متوج عشان ده ينعكس على أداءه فى أى حاجة والأهم أنه بنى ادم يستحق أنه يعُامل كده .. ازاى ده بقى يحصل و امتى هيحصل و هيحصل أساسا و لا لأ .. الله أعلم بس هى مش محتاجة تفكير كتتير .. لازم تكون البداية ب رئيس دولة بيحترم ادامية الأنسان ويكون ده على قائمة أولوياته و ينعكس ده على اللى تحته و اللى تحته و اللى تحته و يكون فيه كمان حملة تثقيف كبيرة أوى للناس تركز فيهم المعنى ده اللى هو احترام أدامية الأنسان.

غنى يا عم ما أنت بتغنى بفلوسك

طبعا كلكم شوفتوا فيلم الكيف الرائع , و طبعا كلكم عارفيين عبد الله مشرف (عبد الله فى يوميات ونيس). عبد الله قال لمزاجنجى (محمود عبد العزيز) فى فيلم الكيف كلمة حلوة أووى و معبرة , قاله "غنى يا عم ما أنت بتغنى بفلوسك" , هو ده بقى شعورى تجاه معظم الرعاع "حلوه الرعاع دى" اللى بيغنوا دلوقتى فى الساحة الشعبية أقصدى الساحة الغنائية و برضوه شعورى تجاه رعاع الفيديو كليب وأى حد حمار بيغنى لحمار و يقوله بحبك يا حمار .. الأختلاف فى موضوع الغناء شاسع لكن المؤكد أن الكلمة الحلوة اللى تقدم لقدام و تفيد البنى ادم اللى يسمعها و تدى له دفعة فى الحياة أكييد مطلوبة , وأكييد كمان أن الكلام الواطى و الحركات الأوطى و الأثارة (سورى على اللفظ يا جماعة) أكييد أنها حرااااااااااااااام .. عموما أنا مين عشان أقول حاجة حرااام أو حاجة حلال بس ده سينس يا جماعة و العملية باظت خالص لأن دى عالم ما عندهاش دم ..

فى رأى الشخصى أن الصوت الحلو كمان مش كفاية .. لازم كلام الأغنية يوصل رسالة بشكل أو أخر و تأكدها الموسيقى يعنى من الأخر لازم المثلث الجميل الكلمات و الصوت و الموسيقى .. واحد مثلا زى عمرو دياب بيحبه ملايين و صوته فعلا حلو لكن كلام أغانيه مالوش معنى .. فى أغنية قديمة ليه و مشهورة اسمها بيلومونى .. طيب وبعدين يا عم أيه المطلوب يعنى دى خيبة ايه دى .. بلاش دى فيه أغنية تانية جديدة "ومالوا لو تهنا بعيد و سبنا كل الناس" .. استفدت أنا أيه بقى .. أنت عايز تتوه وأنا مالى .. أهو بقى اللى أنا معترض عليه ده بيقولوا عليه دلوقتى زمن الفن الجميل بعد ما جه سعد صغير و هو بيغنى للحمار و يقوله بحبك يا حمار بس العيب مش عليه العيب على ذوق الناس اللى بااااااااظ و بقى فاسد كالفسيخ مع الأعتذار للفسيخ و تشبيهه بأذواق من يستمعوا الى محبى الحمير. فى حاجات كتتير أوى بتأكد نظرية "غنى يا عم ما أنت بتغنى بفلوسك" .. مثلا حد فاكر برنامج أسمه ستار ميكر بتاع خالد كركر سورى خالد كرارة .. فاكريين الحلقة بتاعة اساف لما كسب و حسن أبو السعود كان مموووت نفسه من العياط من تأثير صوت اساف عليه .. يا حبيبى .. حسن أبو السعود اللى كان مش عجبه العجب بيعيط على صوت اساف .. بصراحة يا جماعة أنا أول ما شفته بيعيط أفتكرت كلمة واحدة أتقالت فى موقف مشابه "قبضووه" , هو ممكن اساف يكون صوته حلو بس مش للدرجة أنه يعيط عليه .. فيين أيام سمير غانم و هو بيقول "تجننى تهوسى فوتى علينا بكرة"

.. بس كفاية كده لحسن يطق لى عرق و أروح ضحية الفن الهايف.

من فقر الثقافة الى ثقافة الفقر

كنت خلاص بهييس .. قلت افتح التليفزيون شوية .. لقيت قدامى محمد فؤاد العظيم اللى غاوى دايما حب فى فيلم أسمه غاوى حب .. طبعا أنا مش عايش فى الدنيا لأنى أول مرة أسمع عن الأبهار ده .. فجأة بيتحول محمد فؤاد الى هرقليز أو رجل المستحيل على أقل تقدير .. بيعرف يعمل كل حاجة .. ينط و يضرب و المكان كله محاصر و أوعى الفحت لتقع تحت و خالد الصاوى "حاتم رشيد فى عمارة يعقوبيان" بيعرف يمسك مسدس و محمد فؤاد بيلف و يجرى فى البحر و هوووب العجل وقع .. بصراحة أكتر حاجة كانت عجبانى فى محمد فؤاد كرشه المحترم مع الأعتذار لكل أصحاب الكروش عموما يا جماعة محمد كروز من حقه يفلم زى ما أنا من حقى أضحك على اداءه .. الأقناع مهم للغاية ومحمد فؤاد مش مقنع فى دور عبده الأنتيخ اللى يقدر يعمل كل حاجة .. هو أخره يغنى مثلا ( زماااااااااااااان و أنا صغير .. كنت بحلم أجيب تسجيل) .. مره قريت جملة مش فاكر فيين بتقول "من فقر الثقافة الى ثقافة الفقر" عموما بعيدا عن وجع الدماغ ده أنا طالع أعمل شاى لأنى غاوى شاى.

الصراع بين المثالية و الواقعية

واحد تلاقيه مثالى للغاية فى كل شىء للدرجة اللى تخليه يفشل فشل ذريع فى كل معارك حياته , وواحد تانى تلاقيه واقعى ومؤمن بالواقعية كمعبوده الوحيد لدرجة ممكن توصله لتبرير الوسيلة فى سبيل الغاية اللى بيوصل طبعا للبعد عن مسلمات الفضائل. الصراع بين المثالية و الواقعية شأنه زى أى قضية فى التاريخ أو الحاضر أو المستقبل "بين الأفراط و التفريط" .. الواقعية مطلوبة تماما والأقتراب من المثالية مطلوب برضوه يعنى نلف نلف نلف و نرجع لقيمة أساسية و غاية من غايات الدين الأسلامى الحنيف اللى هى السعى فى تحقيق التوازن فى كل الأمور .. طبعا من أشهر القصص اللى بتتكلم عن الصراع بين المثالية و الواقعية هى دون كيشوت (دون كيخوتة) .. الرواية دى ظهرت فى سنة 1605 و أنتشرت أنتشار أسطورى و أترجمت لكل لغات العالم تقريباً و كانت مصدر الهام للكثير من الأعمال الدرامية زى مسلسل أبو العلا البشرى بجزءيه .. انتشار الرواية دليل على أيه بقى؟

ًالملك يمشى عاريا

أمتداد لموضوع امبارح بتاع جمال الشكل و فساد الروح

نتخيل كده مع بعض .. هل ممكن مبرمج يعمل برنامج أداءه زى (الزفت) و أول ما ينزل البرنامج على الكمبيوتر , الكمبيوتر يقول له أيه الحلاوة دى يا معلم و يتغاضى الكمبيوتر و يغض الطرف عن أخطاء البرنامج .. بلاش دى .. لو مبرمج قال عن برنامجه أنه بيعمل و يعمل و يعمل و قعد يعد فى محاسن و فوائد برنامجه مما ليس فيه , هل الكمبيوتر ممكن يعمل زى المبرمج , ولا الكمبيوتر هينفذ اللى فى البرنامج و خلاص من غير أى (تهجيص) .. أيه بقى اللى يحصل لما المستخدمين (الناس) يستخدموا البرنامج , هيكتشفوا ببساطة أن المبرمج ده (هجاص) و كمان الأستثمار اللى حطوه فى البرنامج ده بشرائهم ليه راح هباءا تذروه الرياح .. نرتفع بقى لمتسوى العلاقات الأنسانيه وننسى خالص البرنامج (الملك فيما بعد) و المبرمج (خياطين الملابس الملكيه فيما بعد) و الكمبيوتر (الأنسان الصادق فيما بعد اللى مش منافق) فيه قصة قريتها من زمان و مش فاكر مين صاحبها بتحكى عن ملك فى العصور القديمة , ملك عظيم (أو هكذا يظن) كان عنده خياطين ملابس ملكية محترفين للغاية , بيعملوا ليه أجمل الثياب الملكية. راحوا للملك فى يوم و خبر سار يرتسم على وجوههم , لقد أستطاعوا أن يخيطوا للملك الثوب الذى لا يراه الا الأقوياء.. يمشى الملك فى المدينه مختالاً فى زيه الجديد و ينادى المنادى هلم يا قووووم لتروا الملك فى الزى الذى لا يراه الا الأقوياء و الناس طبعا واقفه منبهرة على الأخر ((أو هكذا يظنون) , تعدى الشهور و ييجى الخياطون تانى للملك و معاهم البشرى بالثوب الذى لا يراه الا الشرفاء. تعالوا نقرب بالكاميرا شوية .. شافيين اللى أنا شايفوه .. مفيش زى شرفاء ولا حاجه .. الخياطين عامليين أنهم بيظبطوا الزى على الملك و الملك فى واقع الأمر عارى .. شايفيين كمان الأموال اللى بيخدوها من الملك و هما بيتسموا فى خبث واضح للأعمى .. يمشى الملك فى المدينه مختالاً فى زيه الجديد (عريان) و ينادى المنادى هلم يا قووووم لتروا الملك فى الزى الذى لا يراه الا الشرفاء و الناس طبعا واقفه منبهرة على الأخر ((أو هكذا يظنون) .. تعدى الشهور و ييجى الخياطون تانى للملك و معاهم البشرى بالثوب الذى لا يراه الا الأذكياء تعالوا نقرب بالكاميرا شوية .. شافيين اللى أنا شايفوه .. مفيش زى ولا حاجه .. الخياطين عامليين أنهم بيظبطوا الزى على الملك و الملك فى واقع الأمر عارى .. شايفيين كمان الأموال اللى بيخدوها من الملك و هما بيتسموا فى خبث واضح للأعمى .. يمشى الملك فى المدينه مختالاً فى زيه الجديد (عريان) و ينادى المنادى هلم يا قووووم لتروا الملك فى الزى الذى لا يراه الا الأذكياء و الناس طبعا واقفه منبهرة على الأخر ((أو هكذا يظنون) هوووب ييجى عيل صغير شايف حاجه واحده أن الملك عريان .. يقف ويقول بعلو صوته هههههههههه الملك يمشى عاريا الملك يمشى عاريا .. الغشاوة اللى على أعين الناس كلها تروح فجاة و يكتشفوا الحقيقة أن الملك يمشى عاريا لا هو قوى و لا شريف ولا ذكى .. والملك يا عينى يطلع يجرى يخبى نفسه بعد ما هو كمان عرف حقيقة نفسه .. فيين بقى الخياطين .. لسه برضوه بيضحكوا فى خبث خلف هضبة صغيرة و هما بيستعدوا للهروب لمملكة جديدة لملك جديد أهبل يضحكوا عليه.

قصة حلوه مش كده

جمال الشكل و فساد الروح

مستحيل حد يعرف أيه اللى جوه برنامج من الداخل , صعب للغايه أنك تعرف وتشوف السطور الحقيقة لبرنامج تنفيذى .. نفكر كمان شويه .. لو فيه برنامج الواجهة بتاعته حلوه و جميله للغايه .. ممكن نقول كمان أنها أية فى الأبداع .. برضوه ما تضمنش أذا كان مضمونه (سطوره) تحمل ليك الخير أو الشر .. ممكن يكون البرنامج ييحمل فى داخله الشر ليك و لجهازك مهما كان شكله حلو. نرتفع بقى على مستوى العلاقات الأنسانيه نلاقى نفس الكلام برضوه .. تشوف ناس أية فى جمال الشكل و فى نفس الوقت قمة فى فساد المضمون .. المبدع أوسكار وايلد كتب قصة مبدعة للغاية أسمها صورة دوريان جراى بيتكلم فيها عن جمال الشكل و فساد الروح .. واحد أسمه دوريان جراى كان أية فى الجمال .. وهو لسه شاب أتمنى أمنية أنه يفضل عالطول شاب حلو زى ما هو و صورته اللى رسمها ليه رسام مشهور هى اللى تشيخ .. أمنيته أتحققت و يفضل هو على جماله طول عمره مع أضافة بسيطه أن صورته هاتحمل كل أثامه بمعنى أى غلط أى مصيبه هايعملها هتنعكس على صورته .. مع مرور الوقت هايخاف من صورته كما لو كان شايف قدام مريض بالجذام من كتر قبح الصورة اللى بتعبر عن قبح أفعاله .. يعنى من الأخر شكله جميل و باطنه الحقيقى معكوس فى الصورة .. قصة جميلة للغاية مليئة بالمحاورات الفلسفية بينه و بين أبطال القصة عن المعنى الرائع ده

وأنا باكتب التدوينة دى سئلت نفسى أيه الفايده منها؟ هل أنى أفكركم أن جمال الشكل لا يغنى عن جمال و أستقامة الروح .. قديمه و معروفه .. فكرت شويه .. أنا باكتب التدوينة دى عشان أفكر نفسى قبلكم أنى على قد ما أقدر أخلى باطنى زى ظاهرى .. الخداع و تجميل الظاهر فقط دون المضمون شىء قبيح للغاية خصوصا مع اللى بتحبهم و يحبوك .. أسوأ شىء لما واحد بيحبك و تحبه وفى يوم من الأيام يقولك أنا أتصدمت فيك بعد ما أكتشف حقيقتك .. بلاش يقولها كفايه أنك تشوفها فى عينه .. جميل جدا طب ليه على قد ما أقدر .. لأن فيه حكمه بتقول تذءب حتى لا تأكلك الذئاب .. يعنى فيه ناس ماينفعش الواحد يبقى صريح وواضح تماما معاهم .. مش معنى كده ننافقهم .. بس نحترس بشكل أو بأخر

مش لاقى غير الحديث العظيم الشريف ده كختام للتدوينة الفقيرة دى

"إن الله قال لقد خلقت خلقا ألسنتهم أحلى من العسل وقلوبهم أمر من الصبر فبي حلفت لأتيحنهم فتنة تدع الحليم منهم حيرانا فبي يغترون أم على يجترئون قال أبو عيسى هذا حديث حسن غريب من حديث بن عمر لا نعرفه إلا من هذا الوجه حدثنا أحمد بن سعيد الدارمي حدثنا محمد بن عباد أخبرنا حاتم بن إسماعيل أخبرنا حمزة بن أبي محمد عن عبد الله بن دينار عن بن عمر عن النبي صلى الله عليه وسلم قال إن الله قال لقد خلقت خلقا ألسنتهم أحلى من العسل وقلوبهم أمر من الصبر فبي حلفت لأتيحنهم فتنة تدع الحليم منهم حيرانا فبي يغترون أم على يجترئون قال أبو عيسى هذا حديث حسن غريب من حديث بن عمر لا نعرفه إلا من هذا الوجه"

الشر مش بس فى ارادة السوء كمان فى سوء الأراده

فيلم الكيف من أجمل الأفلام اللى شوفتها فى حياتى , قد أيه فعلا فيه حاجه أسمها فن هادف , فيلم بيجمع بين الضحك حتى الموت و بين التوعيه بشكل أو بأخر لفساد الأراده , فى أخر الفيلم كان فيه عباره قالها يحيى الفخرانى .. كلمه هزتنى من الأعماق "الشر مش بس فى ارادة السوء كمان فى سوء الأراده" يا عينى محور أخلاقى كامل .. نركز شويه .. الكلمه ليها ألف تفسير و تفسير .. التفسير الرئيسى هو أن ضعف الأراده سبب من أسباب الشر زى الأراده الفاسدة القصد والنيه و الهدف وفيه تفسير تانى قالتهولى أخت فاضله "ربنا يحفظها و يبارك فيها" وهو "أن أحنا ممكن نعمل السوء و أحنا مانعرفش أنه فيه شر علشان كده جاب واره سوء الأراده عشان كده لازم نعمل فرمله للنفس و نخليها تفرق بين الصواب و الخطأ حتى لو النفس ليها رغبه فيه" أنتوا رأيكم أيه ؟ أيه هى التفسيرات الأخرى للجمله الرائعه دى؟