أبريل جلاسبى

لقطه أجمل منها مفيش النهارده فى مسلسل عايش فى غيبوبه .. لما دنيا أفضل بعتت واحده لعمار عشان تقنعه أنه ياخد الماكينات اللى فى مصانع أخوه عبد الغنى لأنها حقه .. لو فكرنا شويه و بما أن دنيا أفضل "إيمان" هى أمريكا يبقى اللى بعتتها لعمار هى سفيرة أمريكا السابقه ابريل جلاسبى اللى راحت لصدام حسين "عمار فى المسلسل" و أعطت له الضوء الأخضر لمهاجمة الكويت لأنها بتسرق منه بترول على حد زعمها و وقالت له أن أمريكا كلها لن تتدخل فى هذا الصراع

محمد صبحى عايش فى غيبوبة

النهاردة فوجئت أن فيه مسلسل جديد لمحمد صبحى أسمه عايش فى غيبوبة بيتعرض على القناة الأولى .. أى مسلسل لمحمد صبحى لازم أتفرج عليه بدون نقاش , محمد صبحى محترم و بيحترم عقلية المُشاهد فى زمان نُدر فيه أحترام الأعلام لعقلية المُشاهد .. بصراحة هى دى أهم حاجة عندى أن أتعامل مع أعلام يحترم عقلى عموما .. المسلسل جميل أوى ومن أول ما شفته حسيت انه أسقاط على كل شخصيات المجتمع .. ما بين أخوه بتاع الأندلس اللى بيبكى على أمجاد الماضى و أخوه دبور اللى طالع واكل نازل واكل و أخوه عاكف اللى عاكف على نفسه فقط و أمه رعايا و أبوه اللى أتضرب فى الأنتخابات ومعرفش يدى صوته .. يارب بقى المسلسل يقدم حلول بشكل أو بأخر للمشاكل اللى بيعرضها .. كفاية بقى .. أحنا شبعنا تحليل و تذكير بمشاكلنا و دى مشكلة ملحوظة جدا جدا فى أعلامنا العربى .. تحليل و عرض و تذكير بالمشاكل بدون تقديم حلول .. شبعنا بقى .. 30 سنة و احنا على الحال ده و ختمت بعمارة يعقوبيان .. عمارة يعقوبيان أختلف الكثير على جدوى فضح مصر بالطريقة دى و خصوصا قُدام العالم الغربى بس أنا رأيى الخاص أن المشكلة الأكبر عدم طرح حلول فى الفيلم لكل المشاكل اللى بيناقشها .. كلها مشاكل معروفة و مفيهاش جديد .. كلها أتناقشت قبل كده .. يمكن أتناقشت بأسلوب مختلف شوية فى يعقوبيان بس فى الأول و فى الأخر أحنا بناقش مشاكلنا من سنوات طوال أوى بدون تقديم حلول ليها من الأخر اللى يعرض مشكلة يحاول يقدم حلول الا لو كانت مشكلة محتاجة تحليل أكتر و تناول فكرى عميق .

كفاية كده