لنتفق أعود من حيث أتيت و أمنحكم
فرصه أخيره للغوص فى بحار قلبى الحر
Saturday, January 27, 2007
بيد أخويا مش بيد عمر ماهو عمر هو أخويا و أخويا هو عمر
على الرغم من الأوڤر الجنسى فى فيلم الكرنك اللى يضعف أى فيلم مهما كانت القضية اللى بيناقشها - وللأسف بيتحول الفيلم من هدف أو رسالة لمجرد أثارة للغرائز مهما كانت مبررات المخرج فى أضافة مثل تلك المشاهد - لكن الفيلم فيه لقطة تستحق جائزة لما محمد صبحى و نور الشريف وبقية المعتقلين يعرفوا من جرائد لقوها بالعافية فى المعتقل أن حرب 67 قامت و تدور بينهم و بين الحراس مشادة كلامية سريعة يعقبها ضرب وحشى و خصوصا لما يرفض محمد صبحى الدخول للزنزانة .. و فى نفس الوقت اللى بتُفتح فيه أبواب المعتقل عشان يدخل مجموعة أكثر وحشية من الحراس لأجبار المعتقلين على دخول الزنازين , تدوى صفارات الأنذار فى كل مكان محذرة من بدء هجوم الطائرات الأسرائيلية .. هنا بقى اللقطة الى بقولكوا عليها , الطائرات الأسرائيلية بترمى القنابل من فوق و فى نفس اللحظة بتنهال الضربات على حلمى "محمد صبحى" فى وحشية تامة .. الطائرات ترمى قنابل و الضربات تنهال على "حلمى" و فى الأخر تنتهى اللقطة بموت "حلمى" ووجهه مغطى بالدماء و تغيب الطائرات فى الأفاق بعد ما مات حلمى.
بس كفاية كده أشفكوا بكرة أن شاء الله مع تدوينة ظريفة عن برنامج مهم لأى واحد عايز يعمل ديمو أحترافى أو بريزنتيشن عالى الجودة.
يحصل أيه لما تجتمع التكنولوجيا و تطويرها مع الطموح لتكوين أسلحة فتّاكة. هى دى فكرة فيلم ريزدنت أيفل 1 اللى هييجى النهاردة على أم بى سى 2 الساعة العاشرة مساءاً بتوقيت مصر إن شاء الله. لأ ما خدتش فلوس من أم بى سى ت نظير الدعاية دى
أنا بحب الفيلم ده عشان سببين الأول أن الفيلم بتتقال فيه كلمة برمجة كتير أوى ده غير أن فيه مبرمج ليه دور مهم فى أنه يطرمخها على دماغ أبطال الفيلم وهما فى مقر شركة أمبريلا اللى بتنتج أسلحة بيولوجية فتاكة والسبب الثانى أن الفيلم أساسا كان لعبة مشهورة للغاية بنفس الأسم"ريزدنت أيفل" و أتعمل منها تسع أجزاء "تقريبا" منهم اللى متسلسلين من زيرو لغاية 5 و الباقى أجزاء منفصلة تماما قائمة بذاتها وأشهر جزء للعبة هو الثالث "ريزدنت أيفل 3" أو نيمسس و أشهر بطلة هى "جيل الفاتنة" بطلة الجزء الثالث و الأول و اللى هتقابل سلاح بيولوجى أسمه نيمسس و نيمسس ده أسم لألهة أغريقية كانت تخصصها عقوبة اللى بيغضب عليه كبير ألهة الأغريق , كأنه بيرمز لشركة أمبريلا أنها هى كبير ألهة الأغريق المتسلط اللى هيحاول ينتقم من اللى وقفوا فى طريقه أو عرفوا أكتر من اللازم أنا حبيت اللعبة دى لدرجة الهوس , لعبتها أول مرة سنة 2000 ومن ساعتها لازم كل سنة ألعبها مرة على الرغم من أنى خلصتها من زمان
دى صورة التصميم بتاع جيل فى الجزء الأول .. لأ مش حولانة ولاحاجة
ودى صورة جيل فى الجزء الثالث بعد ما المنتج أقنعها أنها تبحبحها شوية فى اللبس
أجمل مراحل الجزء الثالث على الأطلاق لما جيل تروح برج الساعة عشان تبعث بأشارة أستغاثة للهيلوكوبتر لكن نيمسس هيفجر الهيلوكوبتر
أما ديك البرابر الوسيم ده فأسمه ليون بطل الجزء الثانى والرابع. اللى لعب الجزء التانى عارف هو ليه ديك برابر
نرجع للفيلم , الفيلم زى اللعبة إطار خيال علمى بحت مدعوم بموسيقى تصويرية بتلعب على وتر التشويق
دى صورة أليس بطلة الفيلم الجزء الأول و الثانى
أما الصورة دى هتلاقى أليس على الشمال و المبرمج اللى بقولكم عليه قاعد فى النص وهو بيحاول يفتح الباب اللى أليس بتبص عليه واللى هيفتحلهم أبواب جهنم على مصراعيها.
دى بقى صورة جيل وشيرى "شيرى من أبطال الجزء الثانى فى اللعبة" و أليس .. الصورة مأخوذة من الجزء الثانى للفيلم اللى من وجهة نظرى الشخصية مبهر جدا عن الجزء الأول لكن أهبل و مالوش معنى خالص و لا يمكن أستنباط أى قيمة منه على عكس الأول
عموما "يادى عموما دى" فكرة الفيلم بتتضح فى أخر لقطة فى الفيلم لما يحل الخراب بمدينة راكون سيتى تماما بسبب التكنولوجيا و الطموح.
عموما أشفوكوا البوست الجااى عن برنامج هااااااااااااام للغاية لكل من يريد أن ينظم التسلسل المنطقى لأفكاره وهو بيحل مشكلة ما.
بى أس:
الموسيقى اللى فى الخلفية هى الموسيقى التصويرية للفيلم فى أخر حتة خالص لما أليس تتطلع برة و تشوف الخراب اللى حل بمدينة راكون سيتى .. موسيقى حلوة أوى مش كده.
النهارده شفت فيلم تحفه أسمه كليك بتاع ادم ساندلر ... حتة فيلم مالوش حل ... ادم ده الماده الخام للضحك و الطفوله فى نفس الوقت و كل أفلامه غالبا لازم تلاقى فيها فكره حلوه محطوطه فى قالب فانتازيا شيق زى الفيلم ده ... تخيل كده لو معاك ريموت كنترول تدوس على ستوب الحياه كلها تقف .. تدوس على فورورد تعدى مشاهد من حياتك و تتطلع قدام لا لا مش الة زمن و لا خيال علمى خالص ده قالب فانتازى محض ... مشكلة البطل أنه بيحب شغله للدرجه القصوى و طموحاته مالهاش حدود و فى أى وقت يحصل تعارض بين أسرته و شغله يختار شغله و يكبر على أبوه و أمه و مراته وأولاده ... بعد شويه يقابل مورتى "كريستوفر ووكن" و ياخد منه جهاز الريموت و يكتشف أنه ممكن يريح دماغه من أى مواقف تبعده عن الشغل بأنه يسرع حياته و يطلع قدام شويه ... و يفضل يطلع يطلع لقدام لغاية ما يكتشف أنه حقق كل أحلامه و بقى رئيس الشركه اللى كان بيشتغل فيها بس كل اللى بيحبهم و يحبوه أنفضوا من حوله بطريقه أو بأخرى ويكتشف أن
"family comes first" أيه هى الدروس المستفاده من الفيلم الحلو ده 1. لو خدت من حد ريموت كنترول خد بالك أحسن يكون بيسرع الحياه لقدام 2. لو كنت مصمم تستخدمه خد بالك أنك هتخسر اللى بتحبهم 3. الفاصت فوودز بتودى فى داهيه و تقصر العمر 4. family comes first
