الأمريكان أجدع ناس
طبعا كلكم شوفتوا فيلم ناشيونال تريجر اللى أتعمل فى 2004 بتاع نيكولاس كيدج , أنا لسه متفرج عليه امبارح بس للأسف , و أكييد طبعا شوفتوا لما نيكولاس طلع عين أهله وهو بيدور على كنز الفراعين لغاية ما بقت حالته النفسية زى الطين لكن طبعا من جد وجد وخصوصا الأمريكان وقدر نيكولاس يلاقى الكنز الضخم اللى أد الكنز اللى فى فيلم المومياء الأول ألف مرة و بعده ما يلاقيه ضميره الأمريكى ينقح عليه و يقعد يقول أن الكنز ده مش من حق رجل واحد .. ده من حق البشرية جمعااااااااء .. جمعااااااااء و يقرر هو والحشاكيل اللى معاه أنه يوزع الكنز على متاحف العالم المحترمة زى اللوڤر و متحف القاهرة .. أيه الطيبة دى .. ده فعلا الأمريكان أجدع ناس .. بقوا عطوا الكنز لمتحف القاهرة يا سلاااام على الأخلاق .. أيه العظمة دى يا بهريكا " بهريكا ده أسم الدلع بتاع أمريكا زى ما مصر كده أسمها بهية" .. بهريكا العظمى اللى واكله الذهب الأسود فى كل مكان وعملت مجازر و قصص وحورات فى العراق عشان أم الذهب الأسود بتوزع ذهب أصفر نفيس لا يُقدر بثمن لقيمته التاريخية قبل المادية و كمااان لمتحف القاهرة اللى لو شكت بس أن تحته مية وسخة مش بترول هتقولك مصر فيها بن لمبى اللى بيمثل خطر كبير على الأمن البهريكى و تانى يوم هنلاقى القوات الأمريكية محاصره متحف القاهرة مع العلم أن بن لمبى ساكن فى المعصرة حالياعلى الرغم من أن الفيلم خيال بحت و يكاد يعبر الحاجز للخيال العلمى كمان لكن ده قمة الأستهزاء بعقلية المُشاهد و المُشاهد البهريكى قبل المُشاهد العربيكى كمان .. والله صدقت يا حسنين يا هيكل لما قُلت أن أمريكا نجحت فى أختراع شىء واحد بس وهو هوليود
Labels: Americans is the best people, National Treasure movie, أفلام أفكارها تتضحك
