مبرمج حر

زعلان ؟! .. متضايق ؟! .. حاسس أنها ضاقت بيك أوي ؟!

أوك .

دور على أوراقك القديمة .. لقيتها ؟ .. افضل دور وقلب لغاية ما تلاقي مدونتك القديمة السرية اللي كنت بتكتبها زمان على الورق من 5 سنين .. واقعد اقرأ باستمتاع وانت بتضحك .. اقرأ وانت بتشرب الهوت شوكلت تحت البطانية في امسية شتوية .. اقرأ وافتكر أحلامك القديييييمة البسيييطة الساذجة اللي حققتها دلوقت ومش فرحان انك حققتها لأنك نسيت انك حققتها .. افتكر طفولة سطورك , وعلو أحلامك وعزيمتك , وافتكر يأسك من حاجات لما بتفتكرها دلوقت بتقول ايه دة ؟أ انا ازاي كنت بفكر كدة ؟! .

افتكر لما كنت بتكتب الكلام من غير تزويق لأنك بتكتبه لنفسك .

افتكر حبك القديم .. الضحكات .. الابتسامات .. الزعل .. الخصام .. الاشتياق …. وفي الاخر “النهاية” كالعادة .

افتكر اخر اخر اخر مرة شفت اللي بتحبه فيها .. المرة اللي كان نفسك بس تعرف قبلها انها اخر مرة هتشوفوه فيها .

افتكر أول يوم اخدت فيه فلوس من شغل بتاعك .. معمول بأيدك .

افتكر أول حاجة جبتها بالفلوس دي .. وافتكر جبتها لمين .

افتكر وانت قضيت ليلة أو ليالي وحيد في بلد بعيدة .. بتسمع صوت انفاسك , وتروس عقلك وهي بتتحرك …. ولاشئ اخر .

افتكر حد انت زعلته اوي .. قتلته قتل .. سحقته بمنتهي البساطة .. ونفسك من ساعتها تقوله  كل يوم معلهش سامحني .. بس خلاص ماعدش ينفع .

افتكر اول مرة ركبت فيها قطر من سنييييييين طويلة وكنت حاسس انك بتطير وانك خلاص حصلت على نصيبك من السعادة .

افتكر شمس الشتا وهي بتقرصك من الشباك برقة الساعة 8 الصبح , فتقوم تفتح مدونتك القديمة السرية اللي كنت بتكتبها زمان على الورق من 5 سنين وتكتب عن الشمس اللي قرصتك .

افتكر الاشارات .. اشارة .. اشارة .. افتكر لما شفت فلانة بتصلي زماااااان وحلفت انت بعدها انك تنتظم في الصلاة بعد كدة .. افتكر لما خرجت من باب بيتك ومشيت يمين عشر خطوات ومش عارف انت رايح فين بالظبط , وبعد كدة افتكرت واحد صاحبك ماشفتوش من 6 شهور فتقول لما اروح ازوره , وتكون زيارتك ليه هي السبب في أهم وأعجب حاجة حصلت في عمرك وانك تعرف انت رايح فين بالظبط .. افتكر لما تقابل واحد ماتعرفوش اوي وينصحك نصيحة واحدة تغير مسار حياتك , وهو بينصحك ماكنش عارف انه بينصح اصلاً ؛؛ كان مجرد بيتكلم .. افتكر وانت بتدور بيأس في الاعلانات المبوبة علي فرصة عمل وتقفل الجرنال بقرف بس تلاقي اللي ينبهك ويقولك دور تاني فيه بتركيز ,, وتدور فعلاً .. افتكر لما تحكي بشغف لواحد صاحبك عن حلم عايز تحققه لكن وانت بتحكي ماكنش لسة فعلاً حلم بيراودك ,, كانت مجرد خواطر , وتمر الأيام وييجي يبشرك “باشارة” أن حلمك ممكن يتحقق ,, فأنت تقوله “حلم ايه!!” , أنت نسيت أصلا لأنه لسة مابقاش حلم بيداعب خيالك .. هو اللي لسة فاكر شغفك واللمعة اللي في كانوا في عينك وانت بتتكلم .

افتكر كل دعاء دعيته لربنا واستجابه .. وكل دعاء لم يُستجاب وفرحت بعد سنة او اتنين انه لم يُستجاب .

افتكر “الباكت ليست” بتاعتك اللي كتبتها في مدونتك القديمة السرية اللي كنت بتكتبها زمان علي الورق من خمس سنين .. وافتكر ايه اللي ماتحققش منها

افتكر كل اللي قالولك انت كدة ماشي غلط .. وفي الاخر انت اللي طلعت صح .

افتكر احلامك اللي كنت لاتجرؤ على الاقتراب من مجرد التفكير فيها .. ودلوقت بقت زي قطع الصلصال تشكلها زي ما انت عايز .

افتكر أن القدرة على الحلم …

.

.

هي اعظم حلم بجد

.

.

ههريكم تفاؤل

_

ال Serialization هي تقنية تقدر تحفظ بيها ال Objects كما هي .

يعني ايه ؟

يعني اثناء تعاملك مع Object Oriented Programming بتستخدم Objects .. وال Objects دي بيبقي ليها بياناتها الخاصة بيها .. وفي بعض الأحيان بتسأل نفسك سؤال اذا كان ممكن احفظ ال Object دة كما هو ببياناته في ملف لإستخدامه فيما بعد أو لنقله على شبكة لجهاز تاني .. وهنا بييجي دور ال Serialization .

ممكن تفكر في الSerialization كنوع من اعادة البعث أو كنوع من الاحياء للكائنات اللي بتستخدمها اثناء سطرك للأكواد (دة لو استخدمنا كلمة “كائنات” كترجمة لمصطلح objects) .. بمعني اكثر بساطة , انت صممت وكتبت الكلاس بتاعتك وبعدين هتبدأ تستخدمها بتكوين object منها , واستخدمتها واديت الوظائف المطلوبة وانتهي استخدامك للObject واتحرر من الذاكرة ومات .. بس قبل ما ينتهي استخدامك له ولسبب محدد في تصميمك قررت الاحتفاظ بما يحمله الObject دة من بيانات لاستخدامها فيما بعد مع Object جديد من نفس النوع …

لو فكرت بالطرق الاعتيادية فممكن تحفظ كل بياناته لملف بطريقة يدوية تفتقر بشدة للاحترافية .. وبعد كدة لما تيجي تحب تستخدمها تاني , تقرأ البيانات من الملف عشان تودعها في الObject الجديد بطريقة تفتقر برضه للاحترافية .. وهنا فعلياً بييجي دور ال Serialization .. ال Serialization هتحيي لك الكائن دة من جديد وبأسلوب احترافي للغاية .

لو حبينا نقسم عملية ال Serialization :

1.تتأكد ان الكلاس marked as serializable

2.تبدأ عملية ال Serialization وحفظ ال object لملف أو لبافر في الذاكرة

3.لما ييجي وقت اعادة استخدامك تاني له , تبدأ تعمل العملية العكسية .. عملية ال deserialization .. اللي هتقرأ بيها الملف أو ال memory buffer المحفوظ فيه الObject , ومن ثم تُعيد احياء الObject من جديد .

أحد العقبات اللي ممكن تقابلك أثناء عملية ال Serialization هي مثلا أن الكلاس بتاعتك كلها بمكوناتها قابلة للتسلسل أو (marked as serializable) , لكن أنت استخدمت structureداخل الكلاس خارجي غير قابل للتسلسل , وفي نفس الوقت استخدامك له في الكلاس بتاعتك حيوي ومهم للغاية ولايمكن الاستغناء عنه ؛ في الحالة دي ممكن تحاكي ال structure دة بكل تفاصيله في structure جديد داخل الكلاس بتاعتك وبعدين تخليه قابل للتسلسل وبكدة تلف حول المشكلة وتقدر تستخدم ال Serialization للكلاس دي .. طبعا مش بالضرورة الحل دة ينفع في كل الحالات .. وممكن يبقي غير عملي بالمرة في بعض الحالات برضه .

More about Serialization and Deserialization :

Introducing Serialization in .NET

Using Serialization to Persist TreeView Control

Serialization … What is it?

Object Serialization

The Basics of Serializing Objects in PHP

How to serialize an object which is NOT marked as ‘Serializable’ using a surrogate.

فقط للتسجيل ليس أكثر .. السنة اللي فاتت – السنة اللي فاتت ايه!! – في شهر يناير اللي فات النت قطع تقريبا يوم 28 .. ولسة السنة الجديدة مابدأتش واتقطع 6 كابلات زي ما بيقولوا يوم الجمعة الموافق 19 ديسمبر 2008 الساعة العاشرة صباحاً .

الكلمات دي بتعجبني جداً .. لدرجة اني حاططها في كل حتة حواليا .. وعاملها نغمة للمنبه اللي بصحي عليه الصبح .. وبقولها باستمرار لأصحابي لدرجة انهم اتخانقوا من كتر ما بفكرهم بيها .. انا بحس انها ملهمة …. عارف النوع دة من الكلمات اللي بيُثير الحماس أو يشدك وانت بتنزل في بئر الاكتئاب .. ساعات بتقدر تشدك وساعات تجذب انتباهك بس وانت مستمر في النزول وساعات ولاااا كأنك بتسمع .. بس بعد شوية بتفتكر المعاني والكلمات تاني .

وبتلاقي فيه مواقف كتير بتستدعي الكلمات دي تلقائياً .. يعني مثلا .. لما تحس بالانسحاق .. كأنك بتتفرم تحت مكبس تلاقيك بتفتكر …

In a moment, everything can change,
Feel the wind on your shoulder,

ايه يعني ؟؟ .. المشكلة عويصة المرة دي !! .. مش قادر تستحمل .. معلهش .. حس كدة بالرياح وهي بتداعب كتفك .. ممكن الدقيقة الجاية تحمل شئ جديد مختلف ودي روعة الحياة يا عزيزي .. انها متغيرة

.

.

وساعات لما تحس ان مواقف معينة في الماضي مسيطرة عليك تلاقي السطر دة بييجي قدام عينك

Let go of your yesterday.

انسي أي ماضي مؤلم .. ماتخليهوش يسيطر عليك .. وافتكر كلمات تانية ملهمة برضة غناها علي الحجار :

أنا فى إنتظار الصباح

أنا داويت الجراح

وخلاص نسيت اللى راح

ومن جديد هابدأ

وبعد كدة تبدأ الكلمات تفكرك باللي نسيته .. تفكرك بأنك تتطير حتي ولو الواقع بيشدك بكلابشات للأرض

Can you hear it calling?
Can you feel it in your soul?
Can you trust this longing?
And take control,

حاسس بالطيران وهو بيناديك .. حاسس بروحك وهي بتهفو ليه .. والا ماعدتش بتثق في أي شوق لأي حاجة ؟!

.

.

ولما تفتكر كلمة “ما ينفعش” اللي اصبحت احد مرادفات حياتك اليومية .. تلاقي الكلمات تفكرك تاني وتقولك…

Forget about the reasons why you can’t in life,

And start to try, cause it’s your time,

Time to fly.

انسي كلمة ماينفعش وحاول تاني .. ولو لقيت ان فعلاً ماينفعش ومافيش فايدة ماتقولش انا فشلت .. وافتكر ان الفشل مرحلي والنجاح دائم , وان النجاح له ألف طريق مش طريق واحد زي ما بيقول أنيس منصور .

.

.

وفي النهاية .. ايه اكتر كلمات بتلهمك وتثير حماسك ؟

بي اس :

* شكراً يا كريم علي مقال انيس منصور

* عنوان البوست من القصيدة

كان يوماً كابتسامة تعاظمت فاستحالت مدينةً وردية على ربوةٍ حجرية يحوطها من أسفلها أبنية أثرية .. واسمها
.
.
.
مدينة الابتسامات