مبرمج حر

Posted in General | تعليقات 29

التعليقات 29 على نهي رشدي

1. on 23 Oct 2008 at 4:24 am1esraa

   أنا كمان عجباني اوي

   ربنا يحميها, ويارب كل البنات يبقو زيها

2. on 23 Oct 2008 at 9:30 am277math

   “أكيد اللي عملته مش علاج للتحرش كظاهرة ”

   أختلف معك ..

   اللي عملته نهى + الحكم الذي صدر ضد المتهم = خوف لكل من يفكر في فعلة دنيئة كهذه + إرشاد للفتيات أن يقمن بأخذ حقهنّ دون خوف أو خجل متخلّف من كونها أنثى أصلا !

   لم أر البرنامج للأسف الشديد، لكني أعجبت بوالدها جدًا وبوجهة نظره الراقية..

   أتمنى أن يكون هذا أول مسمار في نعش التخلّف المجتمعي في النظرة للمرأة في مصر.

   تحياتي

3. on 23 Oct 2008 at 12:59 pm3أحمد

   esraa

   ربنا يحميها
   

   ………………………………………

   77math

   

   أكيد هيبقي فيه نوع من الارشاد للفتيات .. وأكيد هيخوف المتحرشين ..بس هيخوف صغار المتحرشين .. المتحرش الغلبان اللي عايز يبقي متحرش ومش عارف يبقي متحرش حتي .. لكن الظاهرة نفسها موجودة .. الظاهرة نفسها ثقافة .. ثقافة التحرش .. ايه سببها .. ليه موجودة .. ليه كل المتحرشين دول مقتنعين أن تحرشهم بأي أنثي أي كان لبسها حق أصيل ليهم .. ليه زي ما بيقول علاء الأسواني أن لغاية اخر السبعينيات ماكنش فيه الظاهرة دي بالشكل دة فى اماكن العمل والمواصلات والدراسة مع وجود موضات في اللبس مش موجودة دلوقتي

   وازاي تقنعي كل دول الأول أو معظمهم بفداحة الجرم اللي بيعملوه .. هي دي الحرب الحقيقة .. لكن حرب الخوف والردع مش هتعمل أمان ,, هتخلي برضة البنت ماشية في الشارع قلقانة ,, حتي لو بتلعب كاراتيه .. حتي لو معاها وسائل السيلف ديفنس زي الصاعق الكهربائي والبخاخة .. ماحدش عايز بنته تنزل الشارع تعمل حرب وترجع .. مش بقول انها ماتخدش حقها لو دة حصل .. بس أي بنت في الدنيا في تعاملها مع الشارع مش عايزة غير انها تنزل الشارع في أمان وترجع في أمان بدون احتمالية لكل اللي ممكن يحصل دة أو بالحد الأدني جداً لحدوثه .. المعني اللي اقصده هو اللي وراء الحديث الشريف “فإن طالت بك حياة لترين الظعينة ترتحل من الحيرة حتى تطوف بالكعبة لا تخاف أحداً إلا الله” .. ايه اللي يخلي أنثي مسافرة طول المدة دي وطول المسافة دي مش خايفة ؟! .. مش خايفة عشان فيه ثقافة أمان.

4. on 23 Oct 2008 at 2:59 pm4Mutati0N

   هيا علمت ايه بقي لاني معرفش الموضوع ده ؟

5. on 23 Oct 2008 at 3:06 pm5أحمد

   @Mutati0N

   هتلاقي التفاصيل هنا
   http://www.youm7.com//News.asp?NewsID=45178

   

6. on 23 Oct 2008 at 10:03 pm677math

   دعني إذن أوضح مقصدي ..

   ربما تكون هذه بداية لعلاج التحرش كـ”ظاهرة”، أنا أؤمن أنّه لو آمنت الفتيات أنّ عليهن أن يأخذن حقهن، وألا يتخاذلن بسبب الخوف “خلاص بقى علقة تفوت ولا حد يموت!” ..

   + تم تطبيق أحكام مماثلة على “كلّ” من يُبلّغ عنه بهذه التهمة ..

   + الوعي المجتمعي العام..

   غير كدا .. مفيش أي تغير حيحصل .. وأخْوَف ما أخاف أن يأتي العيد أو يتكرر ما يحدث فيه في غيره ..

   وربنا يحفظ البنات كلهنّ .. ويهدي الجميع ويصلح أحوال بلدنا.

   تحياتي

7. on 24 Oct 2008 at 1:49 am7ahmed sliman

   تحياتي لنهي و كل بنت في مصر تعمل اللي هيا عملته .. أنا فعلاً سعيد جداً بإن المجرم دا أخد جزاؤه و إن كان أقل مما يستحق

8. on 24 Oct 2008 at 5:23 pm8نوارة

   والله يا عمي نهى دي احرجتنا كلنا

9. on 24 Oct 2008 at 6:24 pm9أحمد

   77math

   سعيد بتوضيحك الجميل
   
   ما احنا متفقين اهوه ؛؛ وعي ومحاربة ثقافة التحرش في العقول نفسها + عقاب

   آمين

   تحياتي

   …………………………….

   ahmed sliman

   دة أقل عقاب له ولأمثاله

   …………………………….

   نوارة

   

   أزيك يا ست الستات وزينة البنات

   والله عندك حق

10. on 24 Oct 2008 at 10:53 pm10صاحبة الكلمات

    طبعا انا معاها جدا فى اللى عملته بس فيه كلام ف الحلقه مش عجبنى زى مثلا الكلام اللى قاله المحامى ان مافيش ف القانون و لا ف المنطق حتى معنى للسبب يعنى ان اللبس مش سبب للافعال الحقيرة دى طب ازاى اذا كان فيه ف القانون قتل دفاعا عن النفس و التهمه تخفف عن الجانى مراعاة للسبب؟؟!!

    و انا موافقه تماما ان اللبس مش مبرر كافى لكده لكن مش ننكر برده ان الشوارع دلوقتى بقى فيها مناظر يندى لها الجبين و اى انسان محترم سواء بنت او ولد يتكسف من المناظر دى و بصرف النظر عن دينه كمان

    احنا مش ف مجتمع ملايكه عشان نقول للبنات و الستات البسوا اللى انتو عايزينه و نطلب من الشباب و الرجال ان ماحدش يقرب لهم و الا السجن
    ده حتى فيه مثل بيقول مش تحط الكبريت جنب البنزين
    مش تولع النار و تقول ما تحرقيش . لازم الانضباط يكون من الطرفين

    و هرجع و اقول جدعه يا نهى

11. on 24 Oct 2008 at 11:18 pm11أحمد

    @صاحبة الكلمات

    

    سعيد بتعليقك

    في المقابل لكلام محامي نهي ,, تلاقي كلام محامي الشاب اللي قال دول كانوا ماشيين “بيتقصعوا” .. شوفتي .. سهل أوي يترمي الحمل والمصيبة كلها على البنت .

    محامي نهي قصده أنا القانون مش بيعاقب أصحاب الباب المفتوح لكن بيعاقب الحرامي اللي هيدخل يسرقهم .. ومهما كان مش هينفع ندي عذر للحرامي دة .. على الأقل “ضمنياً” كلمة “معذور” بس هتفتح الباب عشر أضعاف في جرائم التحرش .. دول معذرويين بقة .. دة البنات لبسهم رهيب .. لكن واقعيا هما مش معذرويين .. قانوناً مش معذور .. شرعاً مش معذور ….. تعالي بقة لو جينا للواقع نفسه كمان تلاقي العجب .. لما تلاقيهم بيتحرشوا بواحدة لابسة اسدال وواحدة حامل في احداث التحرش اللي حصلت من سنتين في وسط البلد !! .. دة مؤشر لأيه ؟! .. لما مثلا تسمعي من الناس الكبيرة .. أن زمان في السبيعينات كان في الميكروجيب والميني جيب في اماكن العمل والدراسة وفي الشوراع عادي لكن ماكنش فيه تحرش ولا كل البلاوي دي .. يبقي دة مؤشر لايه ؟!

12. on 24 Oct 2008 at 11:34 pm1277math

    صاحبة الكلمات..

    بتقارني القتل دفاعًا عن النفس – واللي بالمناسبة مش بيبقى فاعله جاني- بالتحرش ؟؟؟؟

    طيب في الحالة الأخيرة دي بيبقى دفاعًا عن إيه معلش ؟

    المناظر المؤسفة المكسفة اللي في الشوارع معلش أصحابها ولاد وبنات، لو كان البنات لبسهم بقى مش محترم، فالولاد كمان لبسهم شنيع والصياعة اللي بنشوفها بتخلي الواحد نفسه يلمّ كل الناس دي ويحرقها في أي محرقة !

    اللبس مش بس “مبرر مش كافي للتحرش” لأ .. دا مش مبرر أصلا لفعلة شنيعة زي دي، وزي ما قال أحمد زمان كانوا بيلبسوا أكثر “خلاعة” من كدا ” وكانوا أحلى كمان !” وما كانش بيحصل اللي بيحصل دلوقت ..

    وعلى رأي نوارة .. لو واحد شاب اتحرش بشاب حد حيقول له شوف كنت لابس ايه؟؟؟

    حد حيقول للشاب ما انت كنت فاتح زراير قميصك ؟ ولا لابس شورت ؟؟

    دي حجة .. عشان نغلط البنات وخلاص !

    وحسبي الله ونعم الوكيل

    تحياتي

13. on 24 Oct 2008 at 11:41 pm1377math

    نسيت أقول إن نهى وصاحبتها كانوا لابسين لبس رياضي .. ولسة راجعين من السفر، ومعروف ظروف العائد من السفر ..

    دا للي شايفين إنه مبرر !!

    ما فضلش غير شعرها بقى !!!!!!!!

    يا مرارتي !

14. on 25 Oct 2008 at 12:33 am14نورا أحمد

    ايه رأيك بقة يا كبير انا شايفة ان اللي عملته نهي غلط

    اه غلط , المفروض كانت سيحت دمه في الشارع ,, وشدته من شعره وسحلته على الأرض وربطته في أي حاجة في الشارع وتعدي عليه بالعربية اللي هو كان راكبها سبع مرات .. والله بجد مش بهذر .. دة أقل واجب لحيوان زي دة

15. on 25 Oct 2008 at 9:46 pm15ahmed sliman

    صاحبة الكلمات …

    هوا فعلا فيه ناس كتير بتقول نفس الكلام بس أنا برضه عايز أعرف هوا لما واحد يتحرش بواحده إيه اللي بيحصل ؟؟ هل بتتحل مشكلته ؟؟!! علي فكره ممكن يكون متجوز و يعاكس و يتحرش الموضوع مرتبط بثقافة و أخلاق و بيئة الشخص و غالبا بيكون الفعل بيدل علي الإستهتار و عدم إحترام الآخرين أو عدم إحساس بقيمة الإنسان عموماً مش مجرد “عفوا كبت” أو كده …

16. on 26 Oct 2008 at 12:18 am16يا مراكبي

    برغم إن موقف نهى مش هو اللي هينهي الظاهرة دي من المجتمع فجأة وبرغم من إن أسباب الظاهرة إقتصادي في المقام الأول .. إلا إن الحكم القضائي ده فيه أمل في التحسن وأمل في الردع وأمل في إن الثقة ممكن ترجع في إن الحق ما بيروحش .. عكس ما إتعودنا في الأيام الأخيرة

17. on 28 Oct 2008 at 12:04 am17بنت مصرية

    البنت دى بجد بنوتة مصرية جدعة اوووووووووووووووووى وبتعرف تاخد حقها صح … وياريت البنات كلها تبقى كده الموضوع هيختلف اووووووووى ،،،، فعلا نهى واللى زيها لازم يبقوا مسندوين من كل المصريين مش بس اهلها واصحابها

18. on 29 Oct 2008 at 12:45 am18صاحبة الكلمات

    77math

    كلامى عام مش ع نهى و صاحبتها . و انا مش بساوى اللى حصل مع الدفاع عن النفس انا مجرد بقول اللى المحامى قاله و بقول ردى عليه .

    ع فكرة من اسبوع تقريبا كان ع mbc4 برنامج امريكى كانت الحلقة عن البنطلون الساقط اللى الولاد بيلبسوه و مدى مهاجمة المجتمع هناك لهم و من كل الاعمار لدرجة اتعملت جمعية تتعلن رفضها للمنظر ده و معانيه المستفزة و تحاربه بشده و ده فى امريكا اللى احنا بنحشر كلامهم فى كلامنا و بنعتبر ده منتهى التقدم و التحضر و بنضرب بيهم المثل ف حاجات كتير و كأننا بلا دين و لا قيم و لا هوية و بيعتبروا ده فعل فاضح ينشر الرذيلة و انه دعوة صريحة للجنس و الكلام اتقال بالحرف على السنة ناس منهم ف الحلقة .

    ahmed sliman

    انا مش بقول ان ده كبت و انا معاك تماما ان الحكاية اكبر من كده بكتير لان الانسان مش مجرد موقف الانسان ده حدوته بس للاسف دلوقتى مش بقت مصرية ، بقت مهلبيه.

19. on 29 Oct 2008 at 1:24 pm19سمراء النيل

    اعتقد اني كنت بعيدة اوي لاني لا شفت ولا سمعت عن الموضوع دة الا من خلال مدونة تانية كان كاتب صاحبها عن الموضوع وانت تاني شخص اشوفه كاتب عنها برضه

    انا مش شفت الحلقة ولا قريتها في الجرانين
    ولا اعرف مين نهي رشدي

    بس انا احترمتها جدا

    وبرفعلها القبعه

    وراي فيها انها محترمة لانها عملت الصح

    ومش يهمني اراء الناس اللي قالت ان هي كان فيها حاجة غلط
    مع احترامي

    حتي لو كانت لابسة من غير هدوم انا بحترمها

    ياريت نتعلم

    وبجد مدونتك وحشتني اوي

20. on 30 Oct 2008 at 1:01 am20صاحبة الكلمات

    ع فكرة نسيت اقول حاجه

    تغطية الشعر او عدم تغطيته مش مقياس احترام و لا ايمان اطلاقا و فيه كتير غير محجبات محتشمات و عارفين قيمة نفسهم و جسدهم و مجتمعهم و قيمهم و فيه محجبات بالاسم فقط للاسف بل بالعكس بيشوهوا صورة الحجاب و الدين

    و هرجع و اقول و بقوة بحترم نهى و صحبتها لانهم عارفين قيمة نفسهم اللى هيا غاليه اوى و مش قبلوا انهم يحسوا بذل و اهانه و يدوا فرصة للتصرفات الغبية دى انها تكون مباحة و حق مكتسب من بعض ضعاف النفوس

21. on 30 Oct 2008 at 9:54 am21ايلاف

    بسم الله الرحمن الرحيم

    ياخواننا سورى مش قادر اقتنع بان فيه بنت ممكن واحد يتحرش بيها الا اذاكانت هيه قابلة للتحرش بمعنى لابسة ضيق او عريان او قصير او شفاق استحلفكم بالله العلى العظيم و اتحدى اى انسان يحط سمكة قدلم قط جعان و يجبرة ماياكلهاش
    او حتى يشتهيها دى لو قدام انسان عاقل جعان و حطيط قدامه لقمة حاف ان ماممدش ايده عليها كفاية انه يشتهيها مهما كان مركزة او درجة ثقافته
    الجنس غريزة ياحضرات و ماتقولوليش كان لبسها محترم بنطلون جينز ضيق يبرز جسمها كفايه اوى لاغراء اى شاب الناس مكبوته عموما سواء شباب او رجالة او حتى بنات و سيدات لو اتبعنا الدين حنرتاح
    يعنى لو كان لبسها محترم ماكانش حيحصل كل ده و بعدين احنا بنتكلم على الغرب انه الناس ممكن تمشى شبه عرايا بدون تحرش
    شيء طبيعى لانهم عندهم اماكن مخصوص لكدة ايه اللى يخليهم يتحرشوا يبقى قدامنا تلات حلول
    1- نوفر اماكن للرذيلة وده طبعا مش حل اطلاقا دى كارثة
    2-البنات تتحبس فى البيوت و ده مستحيل
    3-نروح على المصحف ونقرا كلام ربنا وندور فى الدين الاسلامى و نتبع هدى سيدنا محمد و زوجاته و هوه ده الحل الوحيد
    و صدقونى مافيش حل تانى حتى لو بقت العقوبة اعدام للمتحرش مش حتنتهى القضية دى لا البنات حتلبس محترم ولا الناس حتبطل تبص عليهم
    و شكرا للاهتمام
    ايلاف
    elav_stereo@yahoo.com

22. on 30 Oct 2008 at 10:12 pm2277math

    إيلاف ..

    أعتقد أن الله قد خلق لنا عقولا .. وإلا لكان كلّ الرجال ” متحرشون” لماذا بعضهم محترم ؟ ويغض بصره .. وبعضهم تصل بهم الوقاحة حدّ التحرش والاغتصاب حتى ؟

    اعذرني .. حجّتك لا تسري سوى على الـ كائنات التي هي ” كالأنعام بل هم أضلّ ” !

    هذه هي التي تتحدث عنها وتبرر لها حيوانيتها !

    وأنا أعرف شخصيا فتيات محجبات ومنقبات تتم مضايقتهن ..

    نظريتك خاطئة تمامًا عمليًا ..

23. on 30 Oct 2008 at 10:33 pm23أحمد

    العزيز إيلاف

    

    المتحرش بيدور على أي بنت يتحرش بيها .. وما دام وصل استحقاره وعدم احترامه لنفسه للدرجة دي ؛ فبيتحرش بأي بنت لمجرد سيطرة فكرة التحرش عليه .. فيه حاجة اسمها احترام الذات وتقديرها ,, والمتحرش ماعندوش النقطة دي .. ودي المصيبة الأعظم يا عزيزي بعيداً بقة عن لبس البنات .. وبالتالي اي بنت قدامه هي “غرض” تحرش .. لابسة , مش لابسة هي بقت غرض تحرش .. ومن غير دة كله يكفيه أنه مُحاسب أمام الله عزوجل على نظراته حتي لو عنده كبت ,, ما بالك بحسابه على ايديه اللي بتتمد?!

24. on 31 Oct 2008 at 12:02 am24tasneem

    أحمد ازيييييييييييييييييييييييك عامل اييييه

    على فكرة في تاج ليك يا باشا عندي غشيت فكرته من دندنة وعملته وبقى واجب عليك وابقى تعلم بقى التاجز السهلة دي مش الحاجات الصعبة اللي معرفش بتجيبها منين

25. on 31 Oct 2008 at 12:29 am25روز

    جديد قضية نهي رشدي
    http://horytna.net/Articles/Details.aspx?TID=4&ZID=178&AID=8975

26. on 01 Nov 2008 at 3:08 am26ahmed sliman

    نروح على المصحف ونقرا كلام ربنا وندور فى الدين الاسلامى و نتبع هدى سيدنا محمد و زوجاته و هوه ده الحل الوحيد

    اللي هوا ايه ؟

    الشرع يعاقب المتحرش و لا يعاقب اللي لبسها مش كويس “بتكلم عن العقوبة الدنيوية”

    أما من حيث المنطق فمتهيألي أحمد و ماث ردودهم كفايه

    ———-
    المحامية اللي بتقول إن نهي معاها جواز سفر إسرائيلي نفترض جدلاً إن كلامك صح “دا يغير إيه في القضية ؟ يخلي التحرش بيها عادي يعني ؟!!!” ثم بقي اللي يسئ لسمعة مصر إن واحد يتحرش و لا إن يقال إن المجرم أخد عقابه ؟!!!

27. on 02 Nov 2008 at 11:35 am27صاحبة الكلمات

    انا مش فاهمه ايه القلق ده

    دى لا اول و لا اخر حادثه من النوع ده

    واحد سافل عاكس واحده و تحرش بيها و هيا اخدت حقها و سجنته

    و بعدين نفترض انها مسيحية هل مش من حقها انها تعمل زى ما عملت ؟؟؟

    ده سلوك طبيعى من اى واحده محترمة بتحترم نفسها و بتحترم المجتمع اللى عايشه فيه بصرف النظر عن الديانة

28. on 03 Nov 2008 at 6:43 pm28أحمد

    @صاحبة الكلمات

    هي البلد دي كدة .. أي حد ياخد حقه بيعاملوه كأنه اغتصب حق مش حقه .. يمكن من كتر ماتعودنا مانخدش حقوقنا في أم البلد دي ,, فبقي الشاذ واللي مش الطبيعي هو اللي ياخد حقه .. دة بالنسبة للشق الإستنكاري من بعض الناس لفعلة نهي .

    لكن اللي بيقولوا اسرائيلية ومش اسرائيلية دول مجانين شهرة .. عايزيين يلحقوا شوية من فُتات الكعكعة الإعلامية دي .

29. on 19 Nov 2008 at 10:40 pm29رونيل السوداء

    والله يامبرمج هى عندها حق ف الشعور ده ..

    انا من نوعيات البنات اللى لو ماخدتش حقى من اللى حاول يتحرش بيه بستحقر نفسى..

    النوعية ديه من البنى آدمين موش ليهم حوارات فكرية ولا كلام بالأدب ..دول همجيين ولاااااااابد من الرد عليهم بشكل همجى ..

    ولذلك اتذكر حادثة حصلت لى محاولة تحرش من واحد ف الزحمة وانا نازلة من القطر وهوه طالع وهووووووووووووووووووب رحت رازعاه قلم محترم ونزلت سبت الناس تضرب فيه ولا كانى عملت حاجة .. لكن كان هاين عليه أأقول زى ليلى علوى ف مسرحية (البرنسيسة) .. ((((استريحت))

    وقد كان ..

    للعلم .. انا الحمد لله لبسى محتشم وكمان ساعتها كونت لابسة بلطو شتوى من اولى لأخرى مغطينى وواسع وبوت ومحجبة الحمد لله

    لكن بجد .. مفروض المتحرش يخاف من اللى بيتحرش بيهم لأن ده لا حكومة رادعاه ولا بتاع .. إذا كان مابيخافش من ربنا

    حقيقى ..

    إستريحت

    مع خالص تحياتى …

أكتب تعليقك

(الأسم (مطلوب

(البريد الإلكتروني (لن يُعرض للأخرين) (مطلوب

عنوان مدونتك أو موقعك