مبرمج حر

تحذير : ماتقراش البوست لو مكنتش شفت فيلم

The Illusionist

.

.

.

.

.

.

.

قلي بقة ,, هل كنت تتوقع على الإطلاق نهاية الفيلم ؟! .. بموت انا فى الأفلام اللي تخدعني دي .. فيه فيلم تشوفه بتبقي عارف انه فيه خدعة ما وسواء عرفتها أو مش عرفتها ؛ فكونك عارف انه فيه ثمة خدعة أو ان المجرم موجود اه بس هو مين ,, فدة على الأقل بيقلل من تأثير الخدعة . لكن الجمال كله لما تتفرج على الفيلم وهووووووب تلاقي دش الخدعة البااااااارد نازل عليك .. وتلاقي عينك مفتوحة على الاخر ,, وبتصقف لوحدك ,, ويا سلام لو كنت قاعد فى سينما وكل الناس حست بالإحساس دة وكلهم صقفوا مع بعض فى نفس الوقت .

سميها بقة خدعة أو مقلب أو شئ غير متوقع على الإطلاق حصل فى اخر الفيلم .. سميها زي ما انت عايز .. بموت فى الأفلام من النوعية دي .. هي نوعي المفضل فعلاً .. لأن فى الحقيقة صعب أوي فيلم يخدعني .. تقدر تقول كدة انها حاجة زي ما قال المفتش للساحر “لاتحاول خداعهم ؛ فكل الخدع معروفة” .. مجرد بس انك تشك في وجود خدعة ما ,, دة بيدمر حبكة المقلب في الفيلم مهما كانت قوية ,, مجرد الشك فى وجود خدعة ,, هيخليك على الأقل تشك فى كل أبطال الفيلم بلا اسثتناء .. وعشان كدة انا بحب الفيلم اللي بيخدعني بالطريقة دي ,, لأنه قليل جداً لما بيحصل ولأنه فعلاً بيكون فيلم يستحق .

والفيلم دة كان من النوع دة .. وعشان كدة برضة انا بحب سلسلة سوو .. لأن مافيش جزء بيخلص إلا ولاااااازم تحدي النهاية المحترم .. مش بس كدة كمان .. دة انت بتبقي عارف ان فيه تحدي انك تكتشف النهاية .. بس ايه هي !! .. حاول تخمن …. مممممممممم هو ممكن واحد يقول دة مش حاجة أوي لأن سهل أن المخرج يخبي عنك كتير من مفاتيح اللعبة لغاية الاخر ,, بس علي أي حال انت اللي تنازلت عن الشك بمجرد أن “الفيلم” بدأ يعجبك وتحبه .

…………………………………………………………………..

الساحر لما رجع فيينا ,, كان بيتفنن فى أنه يخلي أهل فيينا يحبوه .. ولما مجموعة أطفال متسولين ييجوا يطلبوا منه فلوس ,, هيديهم فلوس كتير وبمنتهي الحنية وكمان بطريقة ساحرة ,, مش مجرد انه بيعطف عليهم ,, دة كأنه بيلعب معاهم أو بيسليهم …. وتعامله مع الجميع كان في اطار حب .. قدر يخلي الجميع يحبوه , حتي المفتش اللي كان عايز يعتقله حبه .. واحد بس هو اللي ماحبوش , هو ولي العهد … ولي العهد هو الوحيد اللي فهم الساحر صح , وهو الوحيد اللي الساحر كرهه – مش عشان ولي العهد فهمه صح طبعاً – .. ولي العهد كان يستحق الكره والقتل كمان بكل تأكيد على أفعاله اللي عملها واللي ناوي يعملها …. والساحر قدر يخلي كل كل اللي بيحبوه يكرهوا ولي العهد .. بمعني أدق استغل حب الناس ليه في تجييش كرههم لولي العهد .. واللي احنا متفقين انه يستحق الحرق على أفعاله .

…………………………………………………………………..

الإيهام مرتبط ارتباط وثيق بالحب

.

.

والحب ممكن يكون غشاوة تتحط على عينك برفق عشان يتكتب على جبهتك “موهوم”

…………………………………………………………………..

سؤال :

لو حبيت حد أوي .. أي حد .. والحد دة كان طيب وكويس وكمان مُثير للإنبهار لأقصي درجة , وعنده قدرات خاصة أو له سحره الخاص عموماً حتي لو كان انسان بسيط ؛ ولأنه انسان طيب فدة خلاك تحبه أكتر وبسرعة .

السؤال : هل هتسلم عقلك بالكامل للشخص دة ومش هتفكر للحظة لاحتمال انك شايف “وهم” أو “وهم فيه بعض من الحقيقة” ؟؟

ماتتسرعش فى الاجابة وتقول “مستحيل ادي عقلي لحد ابداً مهما كان” ,, ولابرضة تتسرع وتقول “لو انسان يستحق حبي له وطيب ومش خبيث وذو عقل راجح فمفيش مشكلة” …. ماتتسرعش .. بيتهألك ان الاجابة سهلة .. راجع نفسك وافتكر كل الشخصيات اللي عدوا عليك فى حياتك من النوع دة .. مواصفات الشخص دة انه حنين , وطيب , ومش مؤذي على الإطلاق , وله سحره الخاص .. سحر لايُقاوم .. .. وممكن يكون قريب منك جداً .. ممكن يكون من دمك ولحمك كمان .. وكل دة سهل له جداً أنه يفوز بحبك ونُصرتك له ولو معنوياً على الأقل .

.

.

فاكر اذا كنت سلمت عقلك له والا لأ؟؟

.

.

في المقابل بقة .. كرهك لشخص محدد بيدفعك لتدشين كل أدواتك العقلية لاتهامه .. اتهامه بأي حاجة .. ولو حتي من باب انك تكسر انبهارك الخفي بيه .. هو ممكن يكون شخص قبيح , وقبيح للغاية كمان لكن كرهك لشخصه أو لرمزه المتمثل فى شخصيته خلاك فعلاً مش عايز عقلك يسمعه على الإطلاق .. مش بتحاول حتي تسمعه لأنك بتكرهه وبتكرهه جداً بسبب أفعاله وتغطرسه .. ولو هو رمز فأنت بتكره الرمز اللي هو بيمثله .. لكن فيه احتمال ولو واحد فى المليون انه يكون صادق ,, ودة اللي انت حاربته بكل قوتك , لأنك ببساطة بتكرهه .

…………………………………………………………………..

هيثم : انت عايز تقول ايه يعني ؟!

طارق : الفكرة مش تدعيم الشك وعدم الثقة فى الاخرين ,, الفكرة في احترم العقل أولاً وأخيراً قبل مد جسور الثقة…

.

.

للي بتحبهم ,, ويمكن يكونوا بيحبوك

كفاية كدة