في ثواني
Aug 12th, 2008 by Ahmed Saad El Din
في ثواني تكتشف أن كل مشاكل الحياة (أو مشاكلك) مالهاش معني وتااااافهههة طول ما اللي بتحبهم ويحبوك جنبك وقريبين منك
في ثواني تلاقيك عبرت الخط الفاصل بين “رفاهية تعذيب النفس بدون داعي” ل “صدمات المعاناة الحقيقة”
في ثواني ضيقك بكل أشكال الحياة وروتينها بيبقي نعمة بتتمنها .. وتقعد تقول يااااريت ارجع اعرف اضايق نفسي تاني بمزاجي .. ياريت .. ياريت تيجي الرفاهية دي تاني
في ثواني والحياة جميلة وهادية .. وفي نفس الوقت بتستمع بممارسة رفاهية الشكوي ورثاء النفس المستمرين ,, بتاخد البوكس الهيدروليكي فى وشك مرة واحدة
في ثواني بتلاقي نفسك بتقول “قدر الله وما شاء فعل” أو بتسب الحياة وتلعنها وتتهمها بالتفاهة والعبثية
في ثواني بتكتشف أن كل كل اللي كنت عايزوه كان بين ايديك وانت مش واخد بالك لغاية ما ضاع أو ….
.
.
كان هيضيع منك
بي اس :
مجرد خواطر .. أنا كويس وبخير
خواطر؟؟؟
ماااااااااشى
بس كلام عالجرح فعلا
ربنا يقدر كل الى فى الحاله دى انه يخرج منها بسرعه
بجد لانى عارفه لما بتطول بتبقى ازاى
سلامى
)
هممممم
وفي ثواني
كل اللي ممكن يكون مضايقك
بيزول
السلام عليكم ياشباب ياعمر الزهزر انتو عارفين قيمة الابتسامة والفرحة الى من القلب ساعدو غيركو وهتلاقو سعادتكو الى ضاعت منكو ابتسمو واتفائلو خير فى ربنا وطيعو ربكو وراعو حقوق غيركو واتمنو الخير لغيركو واعملو الى عليكو تجاة نفسيكو صدقونى الدنيا فانية عيشو حياتكو بالستر والامانى الحلوة
هذا مايحدث فعلا
فليتنا ندرك ما نحن به من نعم
ونكف عن استعذاب الامنا المصطنعة وتضخيم همومنا التافهة
ولنحيا الحياة بأسعد ما فيها
فلسنا نضمن الآتي
…
تحياتي
سبحان الله .. جاية فى وقتها!!
من يومين كنت فى مستشفى وشفت اللى فى العناية المركزة.. وبعدين فكرت.. لما دى العناية المركزة اللى الواحد بيدفع فيها دم قلبه وممكن يخرج منها على الآخرة.. امال عناية ربنا بينا نسميها ايه؟؟؟ بس احنا فينا حاجة غريبة .. ذاكرتنا طويلة المدى وقصيرة المدى كمان بتكون قوية جدا مع الحزن.. فدايما نفتكر اللى ناقصنا واللى بيحزنّا..لكن نفس الذاكرة دى بتضعف قوى مع الفرح.. مع تذكر النعم وحلاوتها فبننسى بسرعة قوى!! لغاية ما حاجة أقوى مننا تيجي وتخبطنا يمكن نفوق.. فاللهم انى أعوذ بك من شر الغفلة!!
معلش أنا آسفة… بس طلبت كآبة
معاك انا.. الكلام ده كبير
ومعاك بردو انها خواطر كثيرا ما يفكر بها البعض نتيجة للمرور بظرف ما (..؟) على الاقل يجعلهم يفكروا اكثر او يمكن انه حتى من غير مرور بشئ.. مجرد افكار!
يا رب نلقاك على خير دايما..
صح …
الحقيقه يا جماعه البوست دا فعلا جه علي الجرح … انا موضوع تعذيب النفس دا عندي قوي اوي … دايما شايف الدنيا سوده وهتبعت مصايب مع ان في المجمل انا لو بصيت علي حياتي من فوق مش هلاقيها وحشه خالص لكن زي ما انتوا قلتوا احنا ذاكرتنا ضعيفه مع الحاجات الحلوه وقويه مع الحاجات الوحشه … بس مش عارف اعمل ايه علشان اتغير … وبجد انا تعبت من التشاؤم جداااااااااااا