مبرمج حر

لما أحب

Aug 18th, 2007 by Ahmed Saad El Din

لما أحب ابحث عن برنامج بفتح جوجل أو ديلشس , وساعات بفتح soft32 أو download أو freedownloadmanager أو tucows أو softpedia لكن فى الغالب بكتفى ب soft32 , طبعا فيه طرق تانية للبحث عن برنامج يُنفذ أمراً ما .

لما أحب اقرأ معلومات سريعة وقيمة عن حاجة معينة بفتح الويكيبيديا أو ابحث فى جوجل وأدور بعينى على الويكيبيديا فى نتائج البحث الأولى .

لما أحب أدور على معلومات عن فيلم معين , افتح ال imdb

لما أحب أعمل دماغ , أشرب شاى بالنعناع

لما أحب أعمل دماغ عالية عالية يعنى , ابدأ أتعلم مهارة جديدة , سواء فى البرمجة أو التقنية عموماً

لما أحب اتبسط , بكتب تدوينة

لما أحب ادخل عالم داخل عالم , وأحس فعلا بمعنى كلمة عالم داخل عالم ؛ بدخل على الفيس بوك

لما أحب ألعب لعبة حلوة , بلعب كوماندوز أو ريزدانت ايفل أو دينو كرايسس , العاب قديمة أوى أنا عارف بس بحبهم , ولا أمل من لعبهم مراراً وتكراراً.

لما أحب أفصل تماماً , بتفرج على فيلم أو مسلسل أجنبى , بس مش أى فيلم ولا أى مسلسل , الأفلام اللى فيها فايدة جمة أو تقنية وأكشن عالييين أوى أو بتفيض بمشاعر رقيقة أو بتتكلم عن تاريخ شخصية معروفة أو أفلام من نوع “من فعلها” . من سبع سنين كدة , كان فيه مسلسل بيتعرض أسمه The Net , أنا كنت مهوس بالمسلسل دة , وأكتر حاجة كانت بتشد انتباهى فيه أن أبطال المسلسل مش بيكتبوا على الكمبيوتر غير باللمس “touch ” وبسرعة المجانين , (طبعا دة فى معظم أفلامهم برة عموماً) , المهم قلت لواحد قريبى على موضوع الكتابة باللمس , وقالى أنت عندك فى الكيبورد ال F و ال J , الحرفين دول فيهم بروز , تحط السبابة اليمنى على ال J و السبابة اليسرى على F ,ويبقوا guide ليك وأنت بتجيب بقية الأزرار , وفيه برنامج ساعدنى برضة مش فاكر اسمه , وحلفت أنى لازم أكتب باللمس زى العالم دى , اتعلمت الكتابة باللمس فى يوم لكن عقبال ما بقت ايدى سريعة قعدت بتاع سنة .. بس للأسف بكتب انجليزى بس باللمس , مكسل اتعلم كتابة العربى باللمس

لما أحب اقرا لناس حلوة وبتفهم بجد , بفتح جوجل ريدير وأشوف الجديد فى ال 326 مدونة اللى متابعهم , هو أنا فاتحه عالطول أساساً .. نسيت أقولكم أنى بطلت استخدم snarfer وبقيت بستخدم جوجل ريدير عشان أتابع المدونات .

لما أحب أفرفش وأضحك واتبسط جدااااااااااا , بلعب مع طفل

لما أحب أمشى وفى نفس الوقت بكون فى اسكندرية , ببدأ من سيدى جابر , وأفضل ماااااااشى فى شارع أبوقير ,لغاية الابراهيمية وأكسر فى شارع لاجتيه واطلع على الترام وأفضل ماشى لغاية محطة الرمل وألف على المكتبات اللى هناك وأدخل فى شارع صفية زغلول وأشرب خروب فى محل اسمه خروب امال واكسر وارجع تانى لشارع أبو قير وافضل ماشى تااااااانى لغاية كلية الهندسة وبعد كدة أعرج على واحد صاحبى ساكن جنب كلية الهندسة , تقريبا الحوار دة بياخد ساعة ونص أو ساعتين , بس بتبقى ساعتين متعة , عشان بيبقوا تفكير صااااااااافى ت م ا م اً .

لما أحب أدخل مكان يبسطنى بجد , وفى نفس الوقت بكون فى اسكندرية بروح مكتبة اسكندرية , دخلتها 33 مرة , وكل مرة لازم أكتب أنا عملت ايه هناك وقريت ايه واستفدت بأيه , ممكن أقعد من الساعة 11 الظهر لغاية 7 بالليل هناك وأصلى على الباركيه بين الكتب أو لو كنت عامل اشتراك بطلع أصلى برة فى مسجد جنب المكتبة عالطول .. أسعد أيام حياتى اللى كنت بروح فيها المكتبة .. أياااام حلوة

تيجوا نعمل التدوينة دى تااااااااااااج ونسميه “لما أحب” , هههههههه

سلااااااااااااام مؤقت

تحديث:

همرر التاج ل

مها

وأشياء أخرى

انسانة

Posted in Tags, خواطر | تعليقات 28

التعليقات 28 على لما أحب

on 18 Aug 2007 at 4:34 am1Ahmed Essawy

ما شاء الله دا انت راجل صاحب دماغ عليا قوي .
و كمان ليك في الشاي بالنعناع
دا احنا كدا مش قدك
ملحوظه علي السريع
انت مش مخصص وقت لصحابك .
ولا دول مش بتحبهم
انا بهدي النفوس مش اكتر .
on 18 Aug 2007 at 6:59 pm2كريم

ربنا يسعدك دايما يا أحمد .. بجد إنت تستاهل كل خير يا صديقي
on 18 Aug 2007 at 8:38 pm3Nada

رغم التأخير أظن انو أول بوست قريتو الصبح و من غير حتى ما أشرب قهوة

صباح التفااااااااؤل
on 18 Aug 2007 at 11:30 pm4Maha

تدوينة جميلة جدا ما شاء الله

وفكرة تاج ظريفة جدا ^_^
on 19 Aug 2007 at 6:44 am5تسنيم

أحمد ده مش كومنت

روح شوف الكومنتس عندي هتلاقيها مش مظبوطة مش عارفة لييه؟؟؟ مفيش عدد للكومنتس اللي على البوستس وكلمة غريبة كده
on 19 Aug 2007 at 1:13 pm6FTM

تدوينة جميلة جدا…اسكندرية مكان رائع بتاريخة و معالمة و أهلة…جو المكان يساعد على خلق الإبداع و التفكير الصافى بعيدا عن جو القاهرة العصيب
on 19 Aug 2007 at 9:28 pm7مبرمج حر

Ahmed Essawy

بوحمييييييييييييد , أزيك؟؟

يا عزيزى الشاى بالنعناع دة فلسفة أساسا
ههههههههههه

أصحابى هتكلم عنهم فى تدوينة
لما أحب 2
ان شاء الله
انا كنت عايز اتكلم عنهم فى التدوينة بس كانت هتتطول أوى
فقلت أخليها على جزءيين

سلام

………………………………..

كريم

كرررررريم , كيف حالك يا صديقى؟؟
ويسعدك أنت كمان يا كريم , أنت اللى تستاهل كل خير

………………………………..

Nada

دة دليل يا ندى على أن تدويناتى تُغنى عن قهوة الصباح

صبااااااااح اليوجا

على فكرة
“ما زلت مصمم على أنك انتى اليوجا مش أنا”
)

………………………………..

Maha

شكراً على كلامك الجميل , ومستنى اجابتك على التاج دة

^_^

………………………………..

تسنيم

ما كتبتيش كومنت ليه ولا مؤاخذة

)

اتصلحت مشكلة التعليقات خلاص

………………………………..

FTM

شكراً يا فاطمة

أنا بحب اسكندرية جداا
بلد جميل , ليه طعم مختلف على مدار السنة
طعمها فى الصيف حلو ولا يمكن يتنسى
وطعمها فى الشتا أجمل وأجمل , فعلا بتبقى ابداع وتفكير صافى
on 19 Aug 2007 at 11:34 pm8saso

وحشتني مدونتك جدا جدا جدا
اوقات بالعب مع ويكيبديا من صفحة للتانية لحد مانسي انا كنت بادور علي ايه

كل لينك يفكرني بالف حاجة كنت في يوم عاوزة اقرا عنها
امممممم الكتابة باللمس مفكرتش فيها اجرب
اشمعني انا يعني

حلو البوست اوي .. كالعادة
on 20 Aug 2007 at 12:18 am9مبرمج حر

أزيك يا ساسو وازى أخبارك؟؟
والله أنا كمان وحشانى تعليقاتك الجميلة

ما هى دى مشكلة الويكيبديا , الواحد يدخل يقرا حاجة يلاقى نفسه فتح ستين حاجة كمان عايز يقراها
((:
هى مش مشكلة دى ميزة

جربى الكتابة باللمس , متعة بجد , بتحسسك أنك قاعدة قدام بيانو وبتعزفى

شكراااااااا يا ساسو
on 20 Aug 2007 at 11:20 am10اشياء اخرى

دي اول زيارة لي هنا
جميل جدا
ونفسي كمان اتعلم الكتابة باللمس قوي
وانا مستعده اقبل التاج لو مررتهولي
تحياتي
on 20 Aug 2007 at 12:17 pm11مبرمج حر

شكرا على رأيك الجميل وعلى زيارتك

اتعلميها هتعجبك جداااااااا

وهمررلك التاج

تحياتى
on 20 Aug 2007 at 6:21 pm12epitaph

all evoke happy feelings masha Allah,,, just stick to what you love
on 20 Aug 2007 at 7:05 pm13مبرمج حر

Hello Hello Hello, how r u epitaph??

Rabanna Ykramek
on 21 Aug 2007 at 2:34 am14علا من غزة

هو انا ما عنديش تعليق معين

بس فعلا اول مرة اعرف ان البروزات الي في الحرفين دول لسبب ,, تصدق !! انا كنت فاكراهم عيب في التصنيع

هههههههههههههههههههههههههههههههههه

انا بحب الشاي بالنعناع بردو ,, بس مشروبي المفضل هو الشاي باللبن وعليهم نعناع
on 21 Aug 2007 at 3:46 pm15marmad

سلام يا فندم
التدوينة فعلا رائعة ما شاء الله .. الغريب ان بعد قراءتها الواحد شعر بتفاؤل غريب.. يمكن مالوش علاقة.. لكن ده كان احساسى!! ربنا يبارك فيك ويكتر من الناس اللى فى نقاء عقلك وقلبك وسعة علمك
ربما تكون بداية فكرة لتدوينة قريبة ان شاء الله عندى .. الله المستعان
تحياتى
on 21 Aug 2007 at 11:27 pm16مبرمج حر

علا من غزة

أزيك يا علا , كيفك وكيف أخبارك؟

عيب فى التصنيع
هههههههههههههههه

حلو الميكس دة يا علا
شاى و لبن و نعناع
مع أن النعناع زى الفريك ما يحبش مع الشاى شريك

)

………………………….

MarMad

وعليكم السلام ورحمة الله وبركاته

والله أنا فرحان أن التدوينة أدخلت عليكى شعور بالتفاؤل

ربنا يبارك فيكى ياااااااارب

ومستنى التدوينة

تحياتى
on 22 Aug 2007 at 1:32 am17إنـســانـة

هو الشر فى دمك؟؟

عايز تفضفض ماشى فضفض براحتك بس مش تيجى فى الاخر وتقول نعمله تاج

اعوووووووذ بالله

يا بختك رحت مكتبة الاسكندرية

تصدق بردو اول مرة اخد بالى من البروز اللى فى الحرفين دول .. بس ومع ذلك انا بكتب من غير ما ابص ع الكي بوردو ” قرد زى ما الدكتور كانت بيقول عليا” هههههههههههههههههه
on 22 Aug 2007 at 9:43 pm18الملاذ- 1 « جزيـــرة النـــور

[...] أعجبتنى بشدة تدوينة مبرمج حر.. “لما أحب”.. [...]
on 23 Aug 2007 at 8:59 am19sosoooo

كل سنة وإنت طيب

وبخير

وصحة

وسعادة
on 24 Aug 2007 at 1:59 am20مبرمج حر

إنـســانـة

شررررررررر!!!!
أومال لو كنت مررت التاج ليكى صراحة
فى التدوينة , مممممممم
مفيش غير كوكو هو اللى هينتقم لى منك
((:

البروز بيساعد فى الأول بس , لكن بعد كدة الأيد بتحلق فوق الكيبورد زى الطائرة الأف 16 اللى عارفة هدفها
هههههههههه

………………………

sosoooo

وأنتى طيبة وبألف صحة وسلامة
on 29 Aug 2007 at 2:40 pm21Maha

أنا بحل التاج أهو
on 29 Aug 2007 at 4:03 pm22مبرمج حر

أوك

مستنى اجابتك
on 02 Sep 2007 at 11:41 pm23عصفور المدينة

متشكرين يا هندسة ع التاج الجميل ده وإن كان وصلتنا النسخة المعربة منه
on 02 Sep 2007 at 11:52 pm24مبرمج حر

العفو يا باشمهندس .. جزاك الله خيراً على ذوقك ورأيك الجميل فى التاج
on 14 Oct 2007 at 1:41 am25احمد هتلر

مقولتلناش لما بتحب تسمع اغاني بتدخل موقع سمعنا ولا لا ؟
http://www.sm3na.com
على فكره ده موقعي
on 14 Oct 2007 at 2:02 am26مبرمج حر

جميل الموقع والله يا أحمد
on 23 Jul 2009 at 7:27 pm27bentulmuslimeen

الفكرة تحححححفة بصراحة

افتكر انى دخلت هنا مرتين
و علقت مرة منهم
و دى تالت مرة فى الدخول و التانية فى التعليق

لأما حبيت اغير جو جيت هنا

تحياااتى

كأنى لفيت اسكندرية الجمية
on 24 Mar 2010 at 9:00 am28محمد عبد الله

على طول صاحب مزاج وانتقائى فى اللى بتعمله ,,تحياتى لك دائما