About RSS Feeds
Jul 29th, 2007 by Ahmed Saad El Din
لو بتابع عشرة عشرين مدونة مش مشكلة أنك تزورهم من فترة للتانية عشان تشوف الجديد ؛ لكن الكلام دة ما ينفعش فى الحالتين دول
* لو عايز تزور المدونات عالطول أول ما ينزل فيها جديد
أو
* لو بتابع عدد كبير جداً من المدونات
فى الحالة الأولى أنت ممكن تزور المدونة بعد ما يكون إتضاف فيها جديد بمدة .
فى الحالة التانية , مش معقول مثلا لو بتابع 300 مدونة أنك كل شوية تزورهم عشان تشوف اذا كان فيه جديد أو لأ .
* طب الحل ايه؟؟
الحل أن “بطريقة ما” أعرف بمجرد ما يكون المدونة فيها جديد , بدون ما أزورها كل مدة وبكدة هوفر وقت كبير , وهتابع مدونات أكتر , وفى نفس الوقت هعرف أول ما المدونة يبقى فيها جديد عالطول .
* طيب , ايه هى ال “طريقة ما” دى اللى أقدر أعمل بيها كدة؟
الطريقة دى اسمها خدمة ال RSS
ببساطة شديدة , خدمة ال RSS تقدر تعرف بيها أخر الاخبار , والتحديثات فى المواقع اللى أنت بتابعها ,والمواقع المفضلة لك بدون ما تزور المواقع دى كل شوية عشان تشوف اذا كان فيها جديد والا لأ .
* إزاى نقدر نستخدم الخدمة دى ؟؟
فى “نوعية” برامج إسمها “RSS Reader” , البرامج دى بتضيف فيها كل المدونات والمواقع المفضلة لك , والبرنامج هيقولك أول ما يبقى فيه جديد فى المدونات والمواقع دى .
أنا جربت برامج كتير لكن أكتر تلاتة عجبونى هما
Snarfer هو أكثرهم بساطة , بسيط جدا وخفيف مش بيستهلك كتير من موارد النظام وفى نفس الوقت مجانى , و FeedDemon أكثرهم احترافية لكن تقيل وبيستهلك كتير من الذاكرة .
نتكلم شوية عن Snarfer
بعدما ما تنزل Snarfer على جهازك , عايزيين نضيف له المدونات
1.افتح البرنامج والغى ال Folders اللى على الشمال اللى نازلة default مع البرنامج .
1. اعمل كوبى من لينك المدونة نفسها
2. أفتح البرنامج < قائمة File , وبعد كدة New وبعد كدة Feed
3.لو أنت واخد كوبى من لينك المدونة هتلاقيه موجود جاهز فى الخطوة اللى بعد كدة زى ما فى الصورة
4.هتدوس Next Next وفى الاخر هتلاقى المدونة موجودة على الشمال واخر تدوينات فيها على اليمين
بعد كدة اعمل minimize ل snarfer , عشان يقبع فى ال system tray منتظراً التدوينات الجديدة
* فيه “نوعية” برامج تانية فى التعامل مع خدمة ال RSS ؟؟
النوعية اللى فاتت دى من نوع “ديسك توب أبليكشن” , لكن فيه برامج تانية بنفس الفكرة لكن بتشتغل على الويب “ويب أبليكشن” , زى جوجل ريدير .
جوجل ريدير نفس الفكرة بالظبط , هتتدخل على الاكونت بتاعك فى جوجل ريدير وهتلاقى على الشمال Add Subscription
الميزة فى جوجل ريدير أو أى فييد ريدير من نوع الويب أبليكشن أنك ممكن تستخدمه من أى مكان لأنه موقع , مش محتاج أكتر من متصفح على عكس برامج الديسك توب أبليكشن اللى مربوطة بجهازك أنت بس , وعلى فكرة دلوقتى ممكن تستخدم جوجل ريدير أوف لاين
* فيه مميزات تانية لأستخدام برامج RSS Readers سواء كانت ديسك توب أو ويب ؟؟
مميزات وفوائد تقنية وبرامج ال RSS لا تعد ولا تحصى لكن فيه ميزة مهمة جدا , تخيل معايا لو عايز تنزل الويندوز تانى هل هتضطر أنك تضيف كل المدونات دى تانى واحدة واحدة لبرنامج زى Snarfer , فيه حالة كمان , لو عايز تبعت كل المدونات دى لواحد صاحبك مثلا , هل هتبعتهم فى ملف تكست مثلا وهو برضة يقعد يضيف مدونة مدونة للبرنامج اللى بيستخدمه سواء كان ديسك توب أو ويب ؟؟؟؟
لأ , فيه حل للمشكلة دى
برامج ال RSS ممكن تعمل export لكل المدونات على هيئة ملف من نوع اسمه OPML
ولو بتستخدم جوجل ريدير , افتح ال Settings وهتلاقى
Export your subscriptions as an OPML file
* هل كل المواقع بتتدعم ال RSS؟؟
كل المدونات بتتدعم ال RSS , ومش كل المواقع بتتدعم ال RSS , لكن فيه طريقة سريعة تقدر تعرف بيها اذا كان الموقع بيدعم ال RSS والا لأ
لو بتستخدم FireFox أو Opera ولقيت أيقونة ال RSS على اليمين فى ال address bar يبقى الموقع بيدعمها
لو بتسخدم انترنت اكسبلورو 7 ولقيت أيقونة ال RSS مفعلة , يبقى الموقع بيدعم ال RSS
ومش بالضرورة لو الايقونة مش موجودة فى فاير فوكس أو غير مفعلة فى انترنت اكسبلورو 7 أن الموقع مش بيدعم ال . RSS
أخر حاجة , الموقع دة هتلاقى عليه معلومات قيمة عن تقنية ال RSS وتطبيقاتها
سلام مؤقت
بورافوووووووووووو بورافو بورافو
مبسوطه اوي انك عرضت البرامج ديه و شرحتها
مهم اوى ان محدش يبخل بعلمه على حد ر ربنا يكتر من برامجك و ميحوجكش لاى بروجرامر قادر يا كريم
اشكركككككككك بعنف
تسلم أحمد
كويس جدا أنك تكلمت عن موضوع التلقيم دا، لأان كثير مننا الحقيقة واخدينه كأمر مسلم به و مش منتبهين أن فيه ناس ما يعرفهوش.
الموضوع دا مش بس بيساعد على متابعة الجديد في المواقع من مدونات شخصية و غيرها، لكن كمان بيغني عن وسائل ثانية كان الناس يلجؤون لها في الماضي للإعلان عن تحديث مواقعهم، زي القوائم البريدية.
طبعا في ناس بقت بتعمل كدا دالوقتي في المدونات و دي حاجة ما كانتش موجودة من سنة. و دي حاجة مزعجة جدا، لأن أنا مثلا باحب أحتفظ ببريدي للمراسلات الآدمية الشخصية فقط لا غير.
لأن في حاجة مهمة: لو مثلا أنا بابعث لك رسالة بريدية في كل مرة أنشر فيها تدوينة جديدة، و أنت أساسا ما طلبتش مني الاشتراك في القائمة البريدية ال أنا بابعث لها، لأني اصطدت عنوان بريدك من تعليق في مدونتي مرة أو من رسالة جماعية مرسلة لعشرات، فال هيصحل هو أنك غالبا هتعامل الرسائل الواردة مني على أنها سخام، و هتترشح (تتفلتر يعني) إلى الزبالة من غير ما تقراها. فيوم ما يجي خبر مهم جدا يستدعي أني أرسل لك رسالة أطلب مساعدتك فأنت غالبا مش هتقراها و مش هتعدي عليك أصلا، إما لأنها هتحذف آليا، أو لأنك اتعودت تلغي كل ما يصلك مني بدون التفات.
الحاجة الثانية ال أحب أقولها هي أن آر إس إس RSS هو أحد بروتوكولات خدمة التلقيم feeds، و أنا في رأيي أن بروتوكول أتوم Atom، متفوق على RSS من ناحية التصميم. دا رأي تقني شخصي، في ناس متفقة معه و في ناس مختلفين.
أنا فعلا بستخدم فيد ريدير وكويس اوى
وفر معايا وقت كتير بدل ما كنت بدخل على كل البلوجات
بس الجديد انى مكنتش اعرف ازاى احفظ نسخه من البلوجات
وكنت بضطر انى كل ما انزل ويندز اضيف كل المدونات من تانى
انت كده بجد وفرت عليا مجهود كبير يا أحمد بجد
تسلم ايديك
تحياتى
فكرة جميلة فعلا وارجو ان تكون مدونتى من تلك المدونات التى تتابعها باستمرار
شاكر ليك جدا وارجو ان تكون من الزوار الدائمين لمدونتى
ما شاء الله
ربنا يبارك فيك .. التدوينة متميزة وشاملة
أنا لسه كنت بفكر أتكلم عن الحكاية دي في مدونتي .. بس شكلي كده حعمل لينك لتدوينتك
في أمان الله
مفيد اووي الموضوع ده ياحمد
بجد شكراااااااااا
روح يا شيخ الهي يطعمك ما يحرمك و يكسيك ما يعريك و يديك ما يستخسر فيك يا احمد يا ابن حوا و ادم و اللهي بدعيلك كل اما اجي اقرا بدعيلك
قلبي وربي راضين عنك يا مبرمج يا اخويا
Esmeralda
أى خدمة يا أزميرالدا , وألف شكر ليكى أنتى على دعائك الجميل
والله أنا اتبسطت منه جدااااااااااااااااااااااااااااااااااااااااا
ربنا يسعد كل أيامك يا أزميرالدا
…………………………….
Nada
تسلمى أنتى يا ندى
…………………………….
ألف
ما شاء الله عليك بجد , تعليقك مثمر للغاية
تحياتى وفى انتظار زيارتك
…………………………….
reemo
والله أنا فرحان أنك استفدتى من التدوينة
بس أقولك على حاجة جوجل ريدير وبرامج الريدير اللى من نوع الويب أبليكشن
عموما أحسن ألف مرة من برامج الديسك توب زى فييد ريدير
على الأقل بتريح الواحد من حتة تنزيل الويندوز , الواحد هريح دماغه , أنزل الويندوز زى ما أنا عايز , مدوناتى اللى بتابعها موجودة هناك فى جوجل ومش هاقعد أضيف الملف تانى واعمل والتدوينات تتضاف تانى للريدير واقعد أحول كل التدوينات تانى من
UnRead
ل
Read
دة غير أنى أقدر ادخل عليها من أى مكان لأنها موقع
مممممممممم
عموما هو فيه مزايا لكل أسلوب
تحياتى وتسلمى أنتى
…………………………….
ahmed
أوف كورس يابوحميد , أنا باتشرف بمتابعة مدونتك
…………………………….
Maha
ربنا يبارك فيكى
على فكرة أنا فيه نقاط كتير مهمة نسيت اتكلم عنها
زى مثلا الفروق الجوهرية بين نوعى برامج الريدير سواء الديسك توب أو الويب
دة غير مثلا الجزء بتاع اضافة ريدير فى المدونة نفسها .. يعنى فى نقاط كتير ممكن نستمتع فيها بأسلوبك الجميل فى الشرح ..
ربنا يخليكى
…………………………….
esraa
العفو يا أختى العزيزة اسراء
…………………………….
Memo
ها قد عادت ميمو من جديد
أزيك يا ميمو , ايه الغيبة الطويلة دى
هههههههههه
دعاءك حلو اوى يا ميمو
ربنا يخليكى يا ميمو
ويلاش تغيبى كدة
كنت سألتينى على يوجا , اه يوجا مدونة مشتركة , مدونة للخواطر السعيدة
والتفاؤل
الله يعطيك العافية يا احمد
انت كدة بتزكي عن علمك على فكرة
انا حابة اسألك على الريدر الي بستخدمه الي هو برنامج snarfer
اصل احيانا بيكون شغال عادي وبلاقيه قفل مرة وحدة كدة فجأة ! انا قلت اذا انت استخدمته يمكن حصلت معاك
زائد ان في بعض المدونات ما بتدخلش عليه مش عارفة من ايه
مثلا مدونة احمد شقير مش بيوصلني منها فيد نهائي ! عندك تفسير للحكاية دي ؟
عموما انا بفضل الويندوز ابلكيشين في موضوع الريدر ,, يمكن كتعود ويمكن من ناحية انو بيشتغل اوفلاين بشكل افضل من الويب ابليكيشن
هو كل واحد فيهم له ميزة وعيب ,, طبيعي زي كل الاشياء في الدنيا
سلامات
الله يعافيكى أنتى يا علا
العيب بتاع سنيرفر دة , موجود فى سنيرفر وفييد ريدير وفييد ديمون .. مرة واحدة وبدون أى مقدمات تلاقى جى بى أف حصل ويقفل لوحده .. لكن سنيرفر كان أقل واحد بيحصل فيه الخطأ دة
…………………..
مشكلة أنه مش بيوصلك فييد نهائيا , فممكن أن المدونة معمول لها
Disable
فى سنيرفر نفسه , جربى اعملى كليك يمين على اسم المدونة واختارى
Enable
………………..
انا فضلت شهور بفضل الويندوز أبليكشن , لكن فضلت أنى أحول ل جوجل ريدير من حوالى أسبوع كدة لأنى كل ما أنزل الويندوز لازم أضيف المدونات تاااانى ل سنيرفر ويقعد هو ينزل فى التدوينات تااااااانى واقعد اعلم التدوينات على أنها
Read
وساعات بأنجز واختارهم كلهم ريد باللى قريته واللى لسة , دة غير حاجة كمان أنى مش بعرف أدخل على مدونات إلا من الجهاز اللى عليه سنيرفر , جوجل ريدير وأمثاله بيحلوا كل المشاكل دى , لا بيتأثر بيتنزيل الويندوز ولا مرتبط بجهاز , ممكن أدخل عليه من مكان وطبعا تحديث التدوينات فيه سريع جدااااااا عن سنيرفر لأنه بيتم هناك على سيرفرات جوجل ريدير وأنا مجرد بتوصلنى النتيجة , لكن سنيرفر عشان يلف على ال 300 مدونة اللى عند الواحد بياخد وقت كبييييييييير , طبعا غير مزايا أنى اعمل تاجز للتدوينات فى جوجل
يعنى , من وجهة نظرى الشخصية الويب أبليكشنز متفوقة كتير عن الديسك توب فى موضوع الريدر
سلامات
طيب أنا فيه مشكلة ظهرت عندي دلوقتي
أنا بستخدم الار اس اس مع الفاير فوكس .. وعندي فولدر بتابع فيه الردود .. بس الفولدر عمال يديني فاضي .. لا ردود
مع إن الردود امبارح كانت بتظهر
مش عارفه أشرح المشكلة .. ومش عارفه ايه سببها
أنتى قصدك أن المشكلة بتحصل مع كل المدونات اللى انتى مسجلها فى فاير فوكس , والا مع فولدر مدونة محددة فيهم؟؟
بجد الف شكر ليك على البرامج
والله وانا بدور على البرامج دي قلت لنفسي أكيد المبرمج الحر كاتب عن الموضوع ده
وبالفعل جيت ودورت عندك عشان الاقي معلومات جامدة جدا عن الخدمة الهايلة دي
بس عندي حاجة محيراني
انا بستخدم افانت براوسر وهو فعلا بيدعم الخدمة دي بس لما اجي اديله اي عنوان لأي مدونة مش بيقبلها مش عارف ليه
لكن طبعا موقعك انت عشان انت حاطط عنوان الخدمة فوق اخدتها ونسختها وحطيتها على الافانت براوسر قبلها وشغالة لكن اي مدونة تانية مش بيقبل لينكها
مش عارف ايه الحكاية دي بصراحة ياريت تفيدني
هل في طريقة اقدر بيها اخليه يقبل اي لينك مدونة؟؟
وشكرا للمرة التانية على المدنة الجامدة دي يا احمد
الله يخليك العفو
جرب تضيف للمتصفح لينك الفييد نفسه .. دوس على الفييد اللى فى يمين شريط العنوان اللى فوق وهيجيبلك لينك الفييد نفسه بتاع المدونة
بس جرب تستخدم جوجل ريدير أحسن .. هينجز معاك جامد وهيوفرلك وقت جامد
والعفو أنا تحت امرك
[...] About RSS Feeds [...]
شكراً على الإضافة
رااااااااااااااائع
لا أستطيع أن أشكرك بما يكفي .
@Mr.Pro
العفو
سعيد بتشريفك
…………………………
همّة
العفو .. ربنا يكرمك ..
مبسوط أوى أن البوست فادك
سعيد بزيارتك
