مبرمج حر

نورما كرينهال

Apr 3rd, 2007 by Ahmed Saad El Din

فيه منتدى برمجة لذيذ بادخله من فترة للتانية وفى أحد مواضيع المنتدى كان فيه واحدة إسمها نورما كاتبة رد على موضوع , إسم نورما ده بيفكرنى بذكريات جميلة جداً , بيفكرنى ب نورما كرينهال , أيه أخر أخبار نورما كرينهال يا جماعة؟؟ , أخر حاجة أعرفها إنها ماتت وهى فى عربية ملغومة لكن نورما كرينهال زى العنقاء بالضبط ومش بعيد تكون بتقرأ البوست ده دلوقت , شخصية عجيبة والله نورما كرينهال , أنا أكاد أُجزم أن كل اللى يعرفوا نورما بيحبوها وبيكروهها فى نفس الوقت , حتى عمنا الكبير نفسه اللى إتجوزها بخدعة منها . مشكلة نورما أنها مش مؤمنة على الأطلاق بحاجة إسمها حب لكن إتحولت لشخصية تانية خالص لما إتجوزت عمنا الكبير وهو فاقد الذاكرة ولما رجعتله الذاكرة عطاها إستمارة ستة لأنه إكتشف أنها خدعته بطريقة حقيرة ده غير أنها كانت عدوته اللدودة فإتجننت ورجعت لشخصيتها الحقيقة اللى هى سونيا جراهام وبقى هدفها الوحيد القضاء على أميجو صاندو أو عمنا الكبير أدهم صبرى .

ذكريات حلوة أوى , أول مرة قريت روايات أدهم صبرى كنت فى خمسة إبتدائى وكان هو ساعتها فى سكوربيون جزيرة الجحيم بيحارب هنتر صائد البشر وكان أدهم فاقد الذاكرة .

كانت أيام لذيذة وكنت بستمتع جداً وأنا بقرأ لدرجة أن لو حد نادى علي مش بسمعه خالص .

وطبعاً لا يمكن أنسى كلوديا موريس (موريس مش شيفر) اللى كانت هتموت فى سيبريا ولما هربت بقى هدفها الوحيد هو القضاء على عمنا الكبير , ولا يمكن أنسى جيهان فريد اللى أخر معلوماتى عنها أنها على كرسى متحرك من كتر أر منى توفيق عليها , منى توفيق كانت ماشية بنظرية “أحُب الرجل الخطير و لأ أتزوجوه” لأنها خايفة أحسن يموت , ومن حوالى 15 سنة لما شافت جبل بانشو سيلازر وهو بينفجر وأدهم جواه كانت هتموت وقعدت تقول “ياريت كنت إتجوزت عبيد” , ولفت الأيام ولا إتجوزت الراجل الخطير و لا الراجل الطيب حسام حمدى (ن-2) اللى كان بيموت فيها ومات بسببها وهو بيستميت فى حمايتها من وحشية موشى حاييم دزرائيلي .

وطبعاً لا يمكن أنسى سمير أو خالد , وسيرجى كوربوف اللى خلى أدهم مدمن كوكايين وأدهم كان منظره صعب وهو مدمن , بدقنه ووشه النحيل جداً .

وطبعاً عيب أوى أنسى أنى أتكلم عن فدوى أول حب فى حياة أدهم , اللى قتلتها مارى الدموية قُدام عينه .

كانت أيام لذيذة وكنت بستمتع جداً وأنا بقرأ لدرجة أن لو حد نادى علي مش بسمعه خالص

لكن مش عارف ليه مفيش حد من أصحابى كانوا بيحبوا ملف المستقبل مع أنه أجمل سلسلة لأنه بيتكلم عن فريق متكامل , نور كان معقدنى بإستنتاجاته الأسطورية , عقله كان جبار بجد ووصل لأقصى درجة وهو بيبحث عن د.هاشم صدقى وطبعاً لما أتكلم عن نور , يبقى لازم أتكلم عن بنته نشوى , مبرمجة الفريق العبقرية اللى أسهل حاجة عندها أنها تعمل برامج تخترق بيها أعقد النُظم الأمنية , وعشت فى مأسيها المؤلمة كذا سنة إبتدائاً من رمز القوة لغاية أرض العدم وبعد كده من البركان لغاية نقطة الصفر , لما نور هيرجع غصبن عنه للماضى ويروح قارة أطلانتس , مأسى نشوى كتير , وطبعاً د.خالد رضوان أو فريدرك هدرشتاين اللى أبحر فى نهر الزمن وكان هيبقى سبب فى تدمير كوكب الأرض كذا مرة وطارق أحد أحفاد نور رجع مخصوص من المستقبل بسبب خالد رضوان , بس أنا مش عارف هل طارق هيبقى إبن نشوى ولا إبن محمود أخو نشوى؟؟ , طبعاً ماحدش ينسى رمز الإنجاز “س-18″ وجملته الوحيدة “س-18 فى خدمتك يا سيدى” , س-18 كان بينجز . لما ييجى س-18 , كنت باتثاءب و أعرف أن القصة خلصت خلاص لأنه هيحلها , يمكن المرة الوحيدة اللى س-18 كان عائق للفريق وكان هيتسبب فى أزمة , لما نور وضع القرص إياه بتاع إبن الشيطان داخل س-18 .

كانت أيام لذيذة وكنت بستمتع جداً وأنا بقرأ لدرجة أن لو حد نادى علي مش بسمعه خالص

نيجى بقة لعالم ما وراء الطبيعة الرهيب , ده موضوع تانى , لأنى كنت بعيش فى نفس جو الرواية بتفاصيلها كلها , كنت بحس فيها بحميمة شديدة , شخصيات كتيرة إتكلم عنها د.رفعت , ماجى و هن تشو كان و هارى شيلدون و د.لوسفير و سالم وسلمى و عزت .. كتير جداً , ما وراء الطبيعة كانت فيها حميمية عجيبة , أنا كنت بحبها فى المرتبة التانية بعد ملف المستقبل , المكتب رقم 19 ماقرأت منه إلا روايتين , وحوش إدامية و ساعة الصفر , الجميل فى المكتب رقم 19 إنطباعى عن بطله ممدوح عبد الوهاب أنه أكتر بطل قريب من الواقع . مش هتكلم عن كوكتيل 2000 لأنه محتاج تدوينات كتير عشان أوفى حقه .

كنت برضوه بحب اقرأ نوفا جدااااااا , كانت خيال علمى يفوق التصور ممزوجة برومانسية حالمة , يعنى فاكر قصة من ورقتين فى نوفا كان إسمها المتألمون فى صمت , بتتكلم عن عالم قدر يخترع جهاز يسمع بيه الموجات الصوتية اللى مش بنقدر نسمعها , وهتكون المفاجأة لما يسمع صرخات رهيبة للحشائش لما حد يمشى عليها أو يسمع أنات وتأوهات شجره لما حد يحاول يقطعها ويختم القصة بجملة جميلة معناها أن ياما كائنات بكون إحنا سبب رئيسى فى إيلامها بمنتهى البرود وأن ما أقسى ذلك العالم الملىء بالمتألمون فى صمت . للأسف سلسلة زهور قرأت منها رواية واحدة بس اللى هى “أحببتك فى صمت” , سلسلة جميلة وبتسمو بالأحساس أوى .

كانت أيام لذيذة وكنت بستمتع جداً وأنا بقرأ لدرجة أن لو حد نادى علي مش بسمعه خالص ولما أخلص الرواية كنت برجع لعالم الواقع وأنا مستعجب إزاى فصلت عن عالم الواقع كده طوال مدة قراءة الرواية .

جميل جداً أن الواحد يبقى عنده هواية لما يعملها يستغرق فيها تماماً وينفصل عن عالم الواقع لفترة من الوقت .

كده أنا جاوبت عن أول تاج أعمله فى عمرى التدوينى , التاج مكون من سؤال واحد فقط :

تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها

وزى ما أنتوا شايفين أن السؤال لونه أخضر يعنى تاج طيب وكله خير , ده غير أنه ممكن يفكر الواحد بحاجات جميلة كانت بتخليه سعيد وخصوصاً أن فيه حكمة جميلة بتقول

“Happiness isn’t something you experience; it’s something you remember.”

والأهم من ده كله أن الإنسان بيبقى فى قمة السعادة والإجادة وهو بيتكلم عن حاجة بيحبها .

دُمتم بكل خير وسعادة وسرور

المرة دى مش همرر التاج لناس كتير , وهمرره لكل من

أحمد فؤاد , أزميرالدا , إسراء , أم العيال , إنسانة , إيبتاف , بيسوو , بنت سعد , بنت مسلمة , بنت مصرية , تسنيم , حلم , جارة القمر , جزيرة النور , جوسى , دندنة , دينا , ذو النون المصرى , روزاليا , رونى , ريمو , سارة , ساسو , سامى , سمراء النيل , علأ , عمر أحمد , كريم , لمياء , مااااعلينا-مرام , ماعلينا , محمد عبد الغفار , محمد العنانى , من مجهول , مها , مونى , موودى , ميمو , نادين , ندا , نسيل , نوران , فاطمة , فمتو , يا مراكبى

Posted in Tags | تعليقات 43

التعليقات 43 على نورما كرينهال

on 03 Apr 2007 at 6:53 am1تسنيم

نفسي مرة يجيلك تااج تنساني… كده انا في ذمتي تاجين.. حرام عليك عاااااااااااا
on 03 Apr 2007 at 6:55 am2مبرمج حر

هههههههههههههههههههههههههههههههههههه

لا يمكن أنسى أبعتلك تاااااااااج يا تسنيم , لا يمكن
on 03 Apr 2007 at 7:59 am3أم أحمد

نهارك أبيض من لبن جهينه

أنت بتعمل إعلانات لجهينة ولا إيه

التاج ده ياحرام مامررتوش لكتير ؟؟؟؟؟؟؟؟؟؟؟؟؟

ليه هو لسه فيه مدونين غير دول داإنت ماخلتش حد

تحياتى
on 03 Apr 2007 at 8:24 am4مبرمج حر

صباحك ورد وزهور يا ست الكل

هههههههههههههه
نوع من التجديد , يعنى ممكن المرة الجاية تلاقنى بقول
نهارك أبيض من لبن بخيره

مممممممممممممم
هو كده أنا بعت لناس كتير

تحياتى يا ست الكل

ربنا يسعد صباحك زى ما اسعدتى صباحى
on 03 Apr 2007 at 8:46 am5marmad

يااااااااااااااااااااه .. أعدتنا الى أيام جميلة بحق!! ان هذه الروايات وشخصية أدهم صبرى نفسها كان لها أكبر الأثر فى نفسى… وعلمتنى الكثير.. لغويا، وعلميا، وأخلاقيا بل ووجدانيا أيضا… وتعلمت منها أشياء كثيرة.. ولكن أغربها كان تحمل الألم!! سواء العضوى أو النفسى.. فقد كنت أراه يدرب نفسه على ذلك وكان طبعا كما قلت “عمنا الكبير” يبقى لازم نعمل زيه!! أجمل ما فى هذه الروايات أنها لم تكن اضاعة للوقت، بل المتعة بجميع أشكالها. كنت أحب فيها الهوامش السفلية التى كان يكتب فيها المؤلف “حقيقة علمية”!!
أذكر أنهم اعتادوا أن يوقفوا اصدارها فى اكتوبر من كل عام استعدادا لمعرض الكتاب، فكنت أذهب الى المعرض وأنا أحلم بالكنز الذى سأعود به .. “يا الهى.. عددين جديدين.. وربما كان هناك عدد خاص أيضا” فعلا كانت جميلة!!
ملف المستقبل كانت ممتعة ولكن بعد المائة بدأت أملهّا، فقد أصبحت تعتمد أكثر على الخيال منها على قدرات الفريق العلمية والبوليسية. فى بداياتها كانت مناقشات الفريق تمتعنى للغاية.
وأخيرا زهور… أيضا كانت جميلة فى بداياتها ثم بدأت الأفلام العربي!! فقلت بلاها أحسن!!
أشكرك على ما ذكرتنا به وتحياتى
on 03 Apr 2007 at 11:05 am6يا مراكبي

أنا لسة بأحل أسئلة التاج الأولاني بتاع المدرسة .. أنا عارف إن دي السنة بتاعة التيجان

عموما متشكر كتير إنك إفتكرتني من ضمن الشوية النادريين اللي إنت إخترتهم للتاج ده
on 03 Apr 2007 at 12:19 pm7KaRiM

بجد من أمتع التاجات اللى قريتها .. وهارد عليه قريب بإذن الله .. وبالنسبة لروياتك .. يمكن الوحيد اللى مقرتش منه غير عدد ولا إتنين هى رجل المستحيل !! مش عارف مشدتنيش فى ولا مرة قريتها .. يمكن عشان كنت متابع جدا ملف المستقبل !! الله أعلم
ومتشكر جدا يا أحمد على التاج
on 03 Apr 2007 at 12:47 pm8أحمد

وصلنى التاج بتاعك وأول ما أرجع من المعهد هجاوب عليه على العموم شكرا على التاج ده وعلى فكرة أنت أول واحد يبعتلى تاج
on 03 Apr 2007 at 1:28 pm9بيسو

يااااااااه يا احمد..مش عارفة اقلك ايه..هي غالبا ماسورة تيجان وانكسرت..وماشاء الله كلها اسئلة تقيلة
هجاوبه ان شاء الله
بس انت بجد فكرتني بايام حلوة قوي..وبجد بقى كنت لما بقرأ الكتيبات دي وخصوصا ماوراء الطبيعة مكنتش بسمع حاجة من الي بتحصل حواليا..درجة تركيز فظيعة
وطبعا بابا كان معترض على قرايتي للنوعية دي من الكتب لانه في رايه المفروض اني اقرأ حاجات اكثر افادة لدرجة اني افتكرت ان الوحيدة الي في سني الي بقرأ الكتيبات دي
شكرا يا احمد انك رجعتلي الثقة اني مش وحيدة ومش متخلفة عقليا
ولازم اقول اني لسة مصممة اني اقرأ الكتيبات دي
on 03 Apr 2007 at 3:19 pm10محمد الرفاعى

عزيزى مبرمج حر…يا رجل المستحيل…و ملف المستقبل و ما وراء الطبيعه…على فكره للاسف كان على ايامنا المغامرون الخمسه…تختخ و الشاويش فرقع و و لوزه و محب و عاطف ….هههه…كل جيل و له قصصه….بس من يوم ماانت بدأت تتكلم عن مجموعة رجل المستحيل و ما وراء الطبيعه و الدكتور احمد توفيق…و انا رحت و قعدت ادور فى النت عن اى شئ للقصص دى…عارف ليه…لانى لما كتبت كام حدوته عن المستقبل فى مدونتى …كنت فعلا بحبها قوى و انا باكتبها و رغم انها ما كانتش بتاخد كتير على ان كنت فعلا بانسى نفسى فى زمن 2100 و كانه فعلا بيحصل….فقررت بما انى بحب الكتابه و حبيت هذا النوع المستقبلى من الكتابه و عندى القدره انى اكتب بلغه كويسه …طبعا عارف انى عايز انظفها شويه مع مراجعة شوية نحو…لان الانجليزى غطى عليها شويه علاوة على كده انى اخدت على كتابه المقالات العلمية…فقررت انى اكتب فعلا قصه بس مش على المدونه كبداية …و يكون و اقعها مصر و تكون مستقبليه بس مربوطه بحبال الواقع يعنى ببذور التكنولوجيات الموجوده حاليا على الساحه العلمية و احاول اعملها اسقاط مستقبلى بس فى جو مصرى بعيد عن المبالغه…زى ما كان بيحصل فى حواديتى …عموما هو مشروع و باحاول انى حاليا اخطط اسلوب يكون خاص بيه…يعنى مش تقليد ..المهم ربنا يسهل…عموما يا سيدى نتيجة بحثى على النت لقصص ملف المستحيل و ما وراء الطبيعه لقيت الوب سايت ده و قولت احطه لك لو مش عندك فيه تقرييا غالبيه القصص …و اهو بس يخلينى اشوف نوع من الكتابه المستقبليه من كتاب مصريين…بس مش للتقليد و لكن للاطلاع من باب العلم …و ان شاء الله ح يكون ليه اسلوبى الخاص…عموما رغيت كتير
مع تحياتى يا بطل
http://www.dvd4arab.com/showthread.php?t=242014
on 03 Apr 2007 at 6:05 pm11bahz_baih

ana asef enny a2olak enak neseet aham sha7′seyeten fe rowayat masreya

fares fe fares el andalos, dana 3alashan 7′atroh aret el tare7′ el andalosy we kont mestany yktebo 3anoh

we ragol el mosta2bal elly kont ba7es enha nos ragol el mosta7el we nos malaf el mosta2bal

ana asef enny bakteb bel franco arab bas ana mesh 3aref malha el keyboard beta3ty

bas ya mobarmeg ya 7or enta gamed moot we 3agebny blogak gedan
on 03 Apr 2007 at 8:49 pm12محمد الرفاعى

Raw sockets?! why?
is that the power behind hackers center?!
thanks and all the best!
on 03 Apr 2007 at 9:14 pm13smraa alnil

اخبطك بحاجة في وشك دلوقتي
ولا اجي اولع في بلوجك
يا سيدي قلتلك اخري هفجر نفسي في مدونتك واوديك في داهية
ومش هتمرره لناس كتير
حسبي الله ونعم الوكيل
اكشف راسي وادعي عليكم بايه
يا ابني هو ناقصة
بس تعالي هنا
ايه الحاجات اللي انت بتقراها دي
يا ابني الحاجات دي تموت الواحد ناقص عمر
ادهم صبري يا مفتري
ههههههههههههههههههه
حسستني بجهلي والله
اصل انا اول مرة اعرف القصص والرويات دي
دي مجلات يا كابتن

سؤال علمي لو سمحت
يحتاج الي اجابة علمية بحته برضه
مين نورما كرينهال دي
دي زي غطيني وصوتي ياما
دة انت طلعت مسئف بقي
on 03 Apr 2007 at 10:32 pm14Maha

بسم الله

السلام عليكم

الرد النظري :

ما شاء الله تدوينة جميلة فعلا خصوصا إنها تدور حول روايات مصرية

الرد العملي :

هنــــــا أهـــــــــو
on 03 Apr 2007 at 10:54 pm15خمسة فضفضة

السلام عليكم ورحمة الله وبركاته

ياااه اكنك بتتكلم عني ، بجد رجعتني لايام جميله اوي
ايام ادهم صبري وسونيا جرهام
وملف المستقبل ونور وفريقه الرائع ، بس انت بدئتها من اجزاء متأخره عني شويه ، المكتب رقم 19 ، وفلاش والمواطن المطحون بتاعه
يااه ايام جميله اوي ،
عارف احنا ما كناش بنشتري الاجزاء ، كانت في مكتبات عامله نظام التبديل ، انا فاكره ،كنت تودي جزء قديم وتدفع 20 قرش تاخد جزء جديد والطريقه دي كانت بتخلينا نلاقي اجزاء قديمه ممكن ماتكونش لسه موجوده في المكتبات

ايااااااااااااااام
on 03 Apr 2007 at 11:33 pm16دينا فهمي

ايه ده؟؟؟؟؟؟؟؟؟؟؟؟؟؟؟؟؟؟؟
ده انا فهمت الموضوع غلط خاااااااااالص
انا افتكرتك بتتكلم عن التاج اللى قبل ده واللى قبله

لا وايه
مندمجة جداااااااااا مع كلامك ومستنية بأه اخلص واقوللك الله يا احمد اكنك بتتكلم عنى بالظبط
مش هحرق بأه الكلام هنا علشان هوايتي قريبة جدا منك

بس على فكرة يا احمد
شكلك هتستلم منى التاجات دى بعد ما الدكتورة تستلم منى بحث التخرج وعليك خير
اهم حاجة انك ماتقلقش
غدا لناظره قريب (:
on 04 Apr 2007 at 12:00 am17REEMOO

انتى عارف انت بالبوست ده رجعتنى حوالى 10 سنين ورا
انا كت مدمنه الروايات دى
كنت بموت فى ادهم صبرى ده
وبصراحه بينى وبينك كده
كان فارس احلامى
اما بقى ملف المستقبل فانا حبيت شخصيتين فيه اوى
شخصيه رمزى كنت بموت فيه فعلا
ومحمود صعب عليا اوى لما مات بجد
اما زهور بقى فدى كان ليها عندى عالم تانى بجد
مراهقه ورومانسيه وكده يعنى
بجد كانت ايام حلوه فعلا
بس تصدق انت خلتنى افكر ادور على القصص دى تانى
واقرى الاعداد الجديده منها اشوف ايه التطورات اللى حصلت
تصدق فكره بجد
بالنسبه للتاج
انا هرد عليك بس افوق شويه
علشان اعرف اكتب بتركيز
اصل لسه قايمه من دور برد بعيد عنك
بوست جميل اوى
تحياتى
on 04 Apr 2007 at 12:13 am18Esmeralda

شكرا اوى ليك يا ان بعت التاج داه ليا
انت اول واحد يبعت تاج ليا لأن البلوج بتاعى عمره10 ايام بس تقريبا
انا اكيد حاجاوب على التاج داه ان شاء الله بس لازم اكتبه بروقان
شرفتنى بجد و مدونتك رائعه
اتمنى اكون من الناس اللى من ماس
on 04 Apr 2007 at 12:16 am19zordeak

يااااااااااااه

فكرتنى بأيام تحفة

أنا مسبتش حاجة لادهم صبرى ولا نور الا وقريتها .., زودت عليهم فارس الاندلس .., وكوكتيل 2000 .., وكمان ما وراء الطبيعة وعمنا رفعت اسماعيل .., سافارى .., فانتازيا

كان وقت تحفة فى حياتى .., فعلا كنت استنى لما الروايات دى تنزل .., وبعد ما اشتريها .., اخدهم فى حضنى
وادخل بيهم على اوضتى .., افضل ابصلهم بحب ونظرات من ايااها .., كأنى مع واحدة بحبها

كنت امسك الروايات وارتبهم بايه اللى نفسى اقراه الاول .., وكنت امسك الرواية ومسيبهاش غير لما تخلص

متتخيلش المتعة اللى كنت بحس بيها .., طبعا ا كنت بتخنق ساعات كتير لما الاقى ان العملية طولت والاجزاء كترت .., ساعات عمنا نبيل فاروق كان بيوصل لخمس اجزاء .., كنت بتشل ساعتها

وساعات كنت بتشل من بعض الحلول العبقرية للمواقف اللى ادهم كان بيتحط فيها ..و كانت بتوسع شوية من الدكتور نبيل

المهم انك فكرتنى بده كله

دلوقتى انا مشغول فمش متابع اوى اللى بيحصل .., بس المهم ..انك فكرتنى بحاجة تحفة

مش قلتلك أكييييد هنبقى اصحاب

انا نظرتى متخيبش ابدااااااااااااا

متشكرين يا ابو حمييد عالتاج بس استسمحك تدينى فرصة شوية ومتقولش التاجحمض علشان انا كنت كاتب موضوعين كده ولسه ناوى انزلهم

اصبر عليا الله يخلييييييييك .., التاجات كترت عليا وانا عضمى كبر يا ابنى ومعدتش بستحمل
on 04 Apr 2007 at 1:18 am20محمد العنانى

بعد التحيه
شكرا للتاج وانا شاء الله هجاوب عليه
ده اول تاج ليا
on 04 Apr 2007 at 1:38 am21FTM

انا كنت بحب ملف المستقبل جدااااااا و متابعاة اكتر من رجل المستحيل و فعلا كانت حاجة جامدة جدا مسألة ان نشوى تكبر بطريقة غير طبيعية .وانا مش شايفة ان السلاسل دى تافهة هى جميلة, و برضة المغامرون الخمسة كانت رائعة ..بس لكل مرحلة اهتمامتها ..ما جربتش انى ارجع اقرأها تانى و اعتقد ان الاحساس بها هيتغير برضة بس بلا شك هى شكلت فترة من اجمل ايامنا…المهم انا كدة عليا تاجين هاجوب عليهم ان شاء اللة بس قدلم شوية , شكرا لدعوتك .
on 04 Apr 2007 at 4:12 am22khaled

تعرف انا عندى كل الاعداد بتاعته بأقراها من وقت للتانى
اهه الواحد يخرج من حالة الملل شوية
on 04 Apr 2007 at 7:40 am23محمد عادل \ أوسكار

السلام عليكم ..
متشكر جداً يا جميل على كلامك .. تم الإجابة عن أسئلة التاج اللي فات على رابط مدونتي الجديدة
http://oscar2008.jeeran.com/

تحياتي
محمد عادل \ أوسكار
on 04 Apr 2007 at 2:39 pm24مبرمج حر

عدنا , أزيكم يا جماعة عاملين أيه

marmad

أنها ذكريات سعيدة للغاية
أنا اتعلمت منه كتير جدااااااااااا برضوه واتعلمت من نور وفريقه كتير ومن رفعت اسماعيل ومن أبطال فلاش و سماش وكوكتيل 2000 وفارس الاندلس ورجل المستقبل وعبير بطلة فانتازيا
كتير
وتصدقى بقى أن ألذ حاجة كانت الهوامش السفلية , الهوامش كانت أجمل حاجة فى الموضوع كله , كنت بستنى الهامش بعد الهامش فعلا

كانت بتحتجب الروايات فى فترة الدارسة وينزل اتنين فى نص السنة وكنت أفرح بيهم جداااااااا وبعد كده أربع أعداد فى أخر السنة وكان أكتر عدد كئيب بالنسبة ليا بتاع شهر أغسطس لأنه معناه أنى هنتظر 5 شهور على العدد الجديد تخيلى كمان لو العدد كان ليه جزء تانى وكمان نازل فى أغسطس , مش هنسى بصمة الموت اللى كانت أجمل أعداد ملف المستقبل لكن المشكلة أنه نزل فى أغسطس وكان أول جزء وكانت نهايته احترافية ومشوقة للغاية لما نور يكتشف أن د.هاشم صدقى لسه عايش وبيضحك وهو بيقوله هو والفريق “مفاجأة أليس كذلك” بجد كنت هموت وأعرف حل اللغز ده بس كان لازم استنى 5 شهور

العفو

………………….

يا مراكبي

ههههههههههههههه
هى سنة التيجان فعلا , بس والله تاج لذيذ
والعفو

…………………..

KaRiM

الله يخيليك يا كريم يا صديقى
بس كده تزعلنى منك
تقرأ اتنين بس لعمنا أدهم
طب أقولك
أنت عارف أن أمجد صبحى
كان فيه احتمال كبير يطلع هو أدهم
وأكيد طبعاً حبيت أمجد صبحى

…………………..

أحمد

العفو يا أحمد
أنا ليا الشرف يا أحمد أنى اول واحد أبعتلك تاج

…………………..

بيسو

ههههههههههههه
ماسورة تيجان انفجرت فى المدونات

درجة تركيز فظيعة فعلاً

وهى من ناحية مفيدة فهى مفيدة فعلاً
أولا : فيها تعليم خفى
بمعنى أن الواحد بيتعلم منها قيم كتيييييييير بأسلوب غير مباشر وده أكتر أسلوب ناجح فى تعليم أى قيم
ثانيا : مليانة معلومات مفيدة وبتفتح مجالات قدام الواحد أنه يقرأ فيها
ثالثا : الروايات دى ممكن تخلى الواحد يقرأ الأنواع الأخرى من الكتابات اللى ممكن يطلق عليها الناس أنها مفيدة
رابعا: والأهم أنها قراءة ومفيدة
والعفو يا بيسوو

أنا كنت بتغاظ جداا من اللى يقولى أيه اللى أنت بتقرأه ده بس لما كنت ببص ليه هو الاقيه مش بيقرأ حاجة أو بيقرأ من غير ما القراءة تأثر فيه وفاكر أستاذ وأنا فى خمسة إبتدائى عرف أن معايا قصة لأدهم صبرى كان اسمها شريعة الغاب لما شافها معايا أخدها و قالى القصة دى بخمسة وسبعين قرش مش كنت تجيب بيها حاجة تقرأها أحسن من كده أنا كرهته جدااااااااا فى وقتها , لو كان
تعب نفسه شوية بس وقرأ عنوان الرواية “شريعة الغاب” أو قلب صفحتها كان هيلاقى فيها قيم رهيبة لا يمكن هو يعرف يوصلها لحد

…………………..

محمد الرفاعى

أزيك يا د.محمد
على فكرة أنا فاكر المغامرون الخمسة
فاكر نوسة ولوزة وتختخ وعاطف ومحب
وكنت بحبهم جدااا , كانت أكتر حاجة بتعجبنى أن اعدادها كتيييييييير أوى ومش اجزاء وكنت بستعجب على الدماغ دى بجد الغاز رهيبة تفتح المخ أوى بس أنا للأسف ماكنتش متابعها أوى بس قريت منها بتاع 30 عدد كده وفاكر الشياطين ال 13
13 شاب و شابة
مغامرين من 13 دولة عربية
وفاكر زعيمهم
“الزعيم صفر الذى لا يعرفه أحد”
كنت بحبها اوى وفضلت أمنية حياتى أنى أجيب أول عدد لأنه كان نادر جدااا دورت عليه سنين من غير ما الاقيه
بجد على فكرة أنا حسيت كده لما قرأت تدوينة السندباد بتاعتك حسيت بروح الخيال العلمى اللى بحبها جدااااااااااااااا , الخيال العلمى ده من أمتع أنواع الأدب على الأطلاق ويا سلام لما يكون اطار لفلسفة أخرى

ومستنى اكتمال مشروعك يا د.محمد ومتأكد أنه هيبقى جميل جدا وخصوصا لأطلاعك وبحثك المستمر عن الجديد فى التكنولوجيا وده أنا حسيت جداااااااا فى مدونتك
وعلى فكرة , فيه سلسلة رهيبة جداااا بتتكلم عن المستقبل اسمها فارس المستقبل كان بيكتبها برضوه نبيل فاروق وصدر منها بس حوالى 7 أعداد على ما أعتقد يمكن يكون فيه أكتر بس أعتقد أنهم 7 بس
وشكراً ألف شكر على اللينك يا د.محمد

concerning the Raw Sockets
Raw sockets is a great source of learning a lot of Network Programming topics
تحياتى

…………………..

bahz_baih

والله أنت منورنى جدااااااااااا

بجد أنا اسف أنى نسيت أتكلم عن رجل المستقبل و فارس الأندلس
بس البوست كان طول أوى وخفت الناس تمل , بس الأتنين دول والله بجد من أحلى الروايات
وسبحان الله الأتنين كانت أعدادهم قليلة لكن كل أو معظم الناس حبوهم جداااااااااا
وأحرجتنى بذوقك , ربنا يسعد قلبك زى ما أسعدتنى بتعليقك

تحياتى

…………………..

smraa alnil

ههههههههههههههههههههههههههههه
مالك بس زعلانة ليه يا إنجى
التاج ده لذيذ جداااااااااااا
فاكرة البوست بتاع السابلة عندك , البوست ده عجبنى جداااا
وأنتى عندك مواهب لذيذة جدا ممكن تتكلمى عنها ولما تتكلمى عنها هتفتكرى ذكريات جميلة وأنتى نفسك قلتى كده فى بوست السابلة
يبقى عايزة تولعى فى مدونتى ليه يا إنجى

ولا تموت ولا حاجة يا إنجى دى روايات لذيذة جدااااااا

هاقولك يا إنجى مين نورما دى
عدوة أدهم صبرى اللدودة على مدار العشرين سنة بتوع رجل المستحيل كان اسمها سونيا جراهام
لكن فى العدد رقم 81
أدهم صبرى هيفقد الذاكرة لما ينفجر جبل وهو أدهم صبرى جواه
ههههههههههههههههه
بجد
وبعد ما يفقد الذاكرة , سونيا جراهام هتعرف
لكن لما تشوفه وهو فاقد الذاكرة هتكتشف أنها بتحبه جدااااا على الرغم من أنها عدودته اللدودة وهتجيلها فكرة رهيبة انها تتضحك على أدهم وتقوله انها حبيبته منى توفيق
وتتجوزه وغيرت اسمها من سونيا جراهام ل نورما كرينهال

…………………..

Maha
وعليكم السلام ورحمة الله وبركاته
الله يخليكى يا مها
أنا قريت التاج بتاعك
واجابتك جميلة

شكراً يا مها

…………………..

خمسة فضفضة

وعليكم السلام ورحمة الله وبركاته
أنا سعيد أنك فرحانة بتذكر الذكريات الجميلة دى

المواطن المطحون ده كان عسل بجد
فاكرة لما دخل موسوعة جنيز
هههههههههههه
وفاكرة العالم مفهوم
كان رهيب , أجمل مرة لما كان رايح يجيب فول الصبح وقاعد يقول إزاى عالم محترم يروح يجيب الفول بنفسه واخترع إنسان إلى يروح يجيب الفول لكن ماعرفش يجيبله حاجة والعالم مفهوم كان بيتخنق منه ويقوله “أيها المأفون”, كانت راويات لذيذة أوى وكلها بتكمل بعض فى تناغم عجيب

أنا برضوه كنت ماشى بنظام التبديل ده , كان روعة بصراحة
أياااااااااااااام
فعلاً
تحياتى

…………………..

دينا فهمي

ههههههههههههههههههههههههههه

لا التاج اللى فات حاجة وده حاجة تانية

ده تاج تانى يا دينا

وسهل جدااااااااااااااااااااااااااا

ومش هياخد منك وقت خالص

أهم حاجة انك تعملى التاج بمزاج يعنى خدى وقتك خالص عقبال ما تعمليه

معاكى يا ستى 3 أيام من دلوقت
هههههههههههههههههه
متفقين؟؟
…………………..

REEMOO

يا ريمو معروف أن أدهم صبرى كان فارس أحلام كل البنات
قدرى نفسه قال كده فى أخر سطر فى رواية المعركة الكبرى
قال
“كلكن تهمن غراماُ بأدهم , لست أعرف ما الذى يملكه ادهم صبرى و لا أملكه”
هههههههههههههههه
انا كنت بحب رمزى برضوه ومحمود صعب عليا جدااااااااا لما مات وطلع بعد كده أنه موجود فى عالم تانى كده ومستحيل يرجع تانى لعالمنا لكن كان بيساعد نور والفريق من هناك وفاكر وانا فى تانية ثانوى تقريبا ما محمود قال لنور فى رواية الدوامة و الفجوة السوداء ” تذكر تلك الكلمة ”
بشت
وكنت نفسى أعرف أيه بشت دى لغاية ما طلعت فى الأخر كلمة سر لباب فى كوكب الطغاة اللى نور و أكرم أتدبسوا فيه كانت من أجمل الروايات بجد

بس أنتى ماجبتيش سيرة نور خالص , نور بجد هو أحسن وأفضل شخصية فيهم كلهم , بجد أنا حبيت نور أكتر واحد على الأطلاق

زهور كانت حلوة بس مش عارف ليه فى وقتها ماكنتش بطيقها لكن هى حلوة جداا وبتعلى الأحساس أوى

منتظر التاج
وسلامتك من البرد ألف سلامة يا ريمو

تحياتى

…………………..

Esmeralda

العفو يا أزميرالد

والمدونة بتاعتك روعة بجد والله يا أزميرالد

وأنا اللى أتشرفت بتمرير التاج ليكى

وأنتى فعلا من الناس اللى زى الماس يا أزميرالد

…………………..

zordeak

ياااااااااااااااااااه يا ابو حميد

بجد أنا فرحان أوى بمعرفتك يا صديقى , وأحنا اصدقاء فعلا

فكرتنى بتفاصيل روعة للغاية

كنت أجمع الجديد جنب بعضه و أبقى مش عايز اقراهم أقعد أبصلهم كتيييييييير قبل ما ابدأ القراءة

وخد وقتك خالص فى الإجابة إن شالله اسبوع
ههههههههههه

بجد أنا فرحان بمعرفتك يا أحمد

ربنا يعزك ويوفقك

…………………..

محمد العنانى

العفو يا محمد

…………………..

FTM

نشوى دى كانت حكاية بجد والله بجد أنا فضلت سنين زعلان عليها من مأسيها اللى لا تنتهى ده غير إعجابى بيها الرهيب عشان خبرتها الأسطورية بالكمبيوتر , من بدايات نشوى خالص و حياتها كلها مأسى من الأول خالص فى “ما وراء النجوم” لما سلوى كانت هتقلتها بأيدها وكانت نشوى مندهشة جداا وهى لسه طفلة , وطبعاً لما عطوها نقطة العقار , ومن بعد العقار وكل الأعداد فيها مأساة شكل لنشوى , وخصوصا فى إبن الشيطان و كانت الطامة فى النصر لما ضحت بنفسها وهى بتقول
“اذا كان الموت ات لا ريب فل أمت فى سبيل من أحب”
كانت جملة رهيبة
وحتى لما رجعت تانى , مفيش عددين ورجع عمرها تانى بالعكس لورا وبدأت تصغر ودى كانت أكتر روايات أثرت فيا وهكذا بقا تلاقى أن معظم الروايات لا تخلو من مأساة لنشوى

الروايات دى لا يمكن تكون تافهة , واللى يقول عليها تافهة مش عارف معنى كلمة تفاهة أصلاً

وكده فعلاً تاجين , ماشى قدام عادى , معاكى أسبوع ههههههههههه
والعفو

…………………..

khaled

والله فعلا يا خالد الروايات دى طاردة للملل بجد زى ما بتقول

أنا هرجع تانى أتابعها زى زمان إن شاء الله

…………………..

محمد عادل \ أوسكار

وعليكم السلام ورحمة الله وبركاته

العفو يا محمد
وألف ألف مبروك على المدونة الجديدة يا محمد

ربنا يعزك
تحياتى
on 04 Apr 2007 at 3:03 pm25Nada

ههههههههه الظاهر ان اصحاب المدونات كلهم يقرو و يتفرجو على حاجات غريبة

اوكي يا أحمد استنى تبعثلي الثالث باذن الله واعملهم كلهم بالجملة
ايه رايك؟

تحياتي
on 04 Apr 2007 at 3:21 pm26مبرمج حر

Nada

أزيك يا ندا وأزاى اخبارك
كل سنة وأنتى طيبة

هههههههههههههههههههههه
صحيح

لااااا ماينفعش يا ندا
أنا ممكن أقولك عرض حلو
جاوبى على التاج ده و سيبى التاج اللى فات شوية و جاوبى عليه براحتك خالص
أيه رأيك؟؟

تحياتى
on 04 Apr 2007 at 8:40 pm27Nada

ok

فكرة
on 04 Apr 2007 at 8:42 pm28مبرمج حر

جميل جداااااااااا يا ندا

منتظر اجاباتك الجميلة
on 04 Apr 2007 at 8:45 pm29epitaph

اهلااااااااا بالتاجاااااااااااات

يا مرحب بالمعارك
ههههههههههههههههه

حااااااااااااااااضر

بس انا استمتعت اوي باجابات
لدرجة اني استغرقت في قراءاتها

ماتعتبرش ديه هواية و تبقي اجابة ع التاج؟

هههههههههههههههه
)
on 04 Apr 2007 at 8:47 pm30epitaph

by the way

I did not read “Adham Sabry”.. I did not much like that ,,did not overwhelm me *blush*

But Ref3at Ismail..wow..I love him!!

))))))))
on 04 Apr 2007 at 8:48 pm31مبرمج حر

هههههههههههههههههههه

يااااااااااااااااا أهلأ بالمعارك
هههههههههههه

أما نشوف

وفرحان أوى أنك استمتعى يا إيبى

هههههههههههههه
لا والله , ما ينفعش

والله هما بيكملوا بعض يا إيبى
يعنى أدهم صيرى ليه مميزات
بس عموما معاكى حق
رفعت اسماعيل مالوش حل
وأنا حبيته أكتر من أدهم
on 04 Apr 2007 at 8:53 pm32Esmeralda

هاى يا استاذ:)

انا جاوبت على التاج اهه

يلا خد اول سكوتر و تعالى عندى و قول لى رأيك

على الله يعجبك

سلام
on 04 Apr 2007 at 8:56 pm33مبرمج حر

هااااااااااااااااااااااااااااالوووووو أزميرالد

كيف حالك؟؟

أوك أنا جاى حالاً

هيعجبنى من قبل من أشوفه

سلام
on 04 Apr 2007 at 10:12 pm34tasneem

أولا جزاكم الله خيرا على إن حضرتك بتفكرنى بأول روايات بدأت أتابعها و ما زلت حتى اللآن أتابعها أيضا فأنا من محبى روايات رجل المستحيل و الدائمين على قرأته و قرأة كل ما يكتبه الدكتور : نبيل فاروق و ياريت لو حضرتك تعرف ويب سيت ليه و للروايات تضيفه و السلام عليكم و رحمة الله و بركاته
on 04 Apr 2007 at 10:29 pm35مبرمج حر

أزيك يا تسنيم , وينك من زمان
وجزاكى الله كل خير يا تسنيم
د.محمد الرفاعى جزاه الله كل خير قالى على اللينك ده
http://www.dvd4arab.com/showthread.php?t=242014
هتلاقي عليه الروايات
وعليكم السلام ورحمة الله وبركاته
on 05 Apr 2007 at 10:47 am36dandana

اهو انا مثلا وانا بقرأ اجابتك على التاج….
انفصلت تماما عن عالم الوقع…..

انت بجد فكرتنى بكل حاجة كنت بحبها…ولازلت….

بتحب جيهان اكتر من منى؟….برافو عليك…هانتفق…
العجوز الخرف رفعت اسماعيل….رائع رائع….اعشق كل سخريته…حتى مرض القلب عنده بعشقه….

ملف المستقبل….بحب اكرم اوى….اكتر واحد بحبه…..
زهور جميلة …بس انا بطلت قرايتها من فترة…..

تاج حلو يا احمد…..حلو اوى كمان……
محتاج منى تفكير عمييييييييييييق……عمييييييييق…..
on 05 Apr 2007 at 10:57 am37مبرمج حر

dandana

طبعا جيهان فريد برقبة منى توفيق , منى توفيق نكد أزلى , يمكن كان عندها وجهة نظر فى عدم إرتباطها بأدهم لكن عموما جيهان كانت بتفرفش الراوية بروحها المرحة وجراءتها عن منى بس انا زعلت على جيهان جداااا لأنها على كرسى متحرك دلوقت , ومش عارف أخر الأخبار اذا كانت اتعالجت و لا لسه

رفعت اسماعيل ده اسطورة لوحده

بس عجيبة اوى انك بتحبى أكرم , أكرم لذيذ وشفاف أوى وبيحب نور بجنون بس ساعات بيبقى المادة الخام للرخامة وخصوصا لما كان بيضايق ويقرف محمود زمان
مش عارف ليه محدش جاب سيرة نور , نور والله أحسن واحد فيهم كلهم

الله يا يخليكى يا دندنة
on 05 Apr 2007 at 3:19 pm38يار مدني

بصراحه مدونتك رائعه وجميله وشكرا علي كل الأحوال وياريت تزور مدونتي وخصوصا إنها جديده وقولي رأيك بصراحه…وشكرا(ياسر مدني .إخوان إسكندريه)والله أكبر ولله الحمد
on 05 Apr 2007 at 4:36 pm39مبرمج حر

شكرا على ذوقك
ومن عيناى حاضر هزورك
on 05 Apr 2007 at 11:19 pm40ام العيال

المرادي مس حكسفك بكره صباحا ان شاء الله حجاوب عليه
on 05 Apr 2007 at 11:21 pm41مبرمج حر

ام العيال

تسلميلى يا أم العيال

ربنا يسعد صباحك و كل أيامك
on 06 Apr 2007 at 12:08 am42saso

في خدمتك يا سيدي
انا بكرة البتاع ده بجد ..كنت باحبة اول عدد بعد كده بقي حيلة من لا حيلة له ..كل ماتتعقد يطلعلي س 18 ده اتكسر واتفتقت ودار حوالين الارض وانفجر وراح بعد تاني علشان ينقذ نشوي المملة وبرضة بيطلعلي

مرة كنت عند ليوناردو وبيحكي عن الكتب اللي جابها كان من ضمنها عدد خاص عن س 18 ..كنت هاقفل الصفحة اصلا

متنساش المحاولة الفاشلة لابتكار فارس المستقبل اللي هو مزيج من نور وادهم وكان فاشل جداااااا، العدد الاول كان الوحيد اللي اتباع اعتقد بعدها اختفي

متنساش المرحلة الاولي مع فلاش وسماش دي خدتلها بتاع سنة او سنتين كده
بعد كده مكتبة مدبولي والروايات المبسطة وسلسلة كتابي وفجاة تكتشف ان في دنيا ورا الدنيا صحيح مبهرة صحيح احلي ..بس تحن لغلاف ميكي بتاع دار الهلال مش الاضواء ولغلاف مرسوم بايد حمدي مصطفي عليه صورة ادهم ومني اللي دايما واخدة وضع الخوف او رفعت اللي دايما مفزوع او السخييييييييفة زهور اللي عليها كلام فارغ مش مفهوم

المهم انهم دايما بيوحشوك حتي لو في ايدك كتاب حلو

ميرسي علي البوست والذكريات والتاج وذوقك وكل الحاجات اللي شكلي هاشكرك عليها كل مرة
on 06 Apr 2007 at 1:49 am43مبرمج حر

saso

هههههههههههه

يا عزيزتى ساسو , بقى نشوى مملة , س-18 الراجل كان بييجى ينجز ,
ويكلفت القصة لكن نشوى طيبة جدااا , ما صعبتش عليكى لما قالت
اذا كان الموت ات لا ريب فل أمت فى سبيل من أحب
فى رواية النصر قبل ما تنفجر مركبة بودون

أنا أساسا بتخنق من منى توفيق بصراحة لأنها نكدية جداا , وفلاش وسماش دول هما فاكهة

الموضوع كله , ميدو وعلام وسوزى و المواطن المطحوووون , ههههههههه

العفو يا ساسو يا أميرة